BE-ja propozon 45 miliardë euro kredi të re për Ukrainën
Sh.Ç/RTKlive
Komisioni Evropian ka propozuar një paketë të re financiare prej 45 miliardë eurosh për Ukrainën gjatë vitit 2027, duke parashikuar që kredia të shlyhet nga kompensimet që Rusia pritet të paguajë për dëmet e shkaktuara gjatë luftës.
Presidentja e Komisionit Evropian, Ursula von der Leyen, bëri të ditur se kjo ndihmë synon të mbulojë një pjesë të konsiderueshme të nevojave financiare të Ukrainës, e cila për vitin e ardhshëm përballet me një mungesë financimi prej rreth 70 miliardë eurosh, raporton Reuters.
Sipas saj, mbështetja financiare do të ndihmonte Kievin të forcojë pozicionin e tij përballë Rusisë dhe të ketë më shumë fuqi në procesin e mundshëm të negociatave për përfundimin e luftës.
Von der Leyen theksoi se Ukraina nuk do të jetë e detyruar ta kthejë kredinë derisa Rusia të paguajë dëmshpërblimet për shkatërrimet e shkaktuara në territorin ukrainas.
Pjesa tjetër e nevojave financiare pritet të mbulohet nga partnerët ndërkombëtarë të Ukrainës.
Propozimi i ri duhet të marrë miratimin e shteteve anëtare të Bashkimit Evropian. Ai vjen krahas një pakete tjetër kredie prej 90 miliardë eurosh, për të cilën liderët evropianë kanë arritur marrëveshje për financimin e Ukrainës gjatë viteve 2026 dhe 2027.
Me këtë nismë, BE-ja synon të sigurojë vazhdimësinë e mbështetjes ekonomike dhe financiare për Ukrainën, ndërsa lufta me Rusinë vazhdon.






















