Ndryshojnë balancat në NBA, Durant, Irving dhe Jordan bashkë në një ekip
BKT
Sport

Ndryshojnë balancat në NBA, Durant, Irving dhe Jordan bashkë në një ekip

Kevin Durant ka vendosur të largohet nga Golden State Warriors, pas një qëndrimi prej 3 vitesh në Oakland, ku arriti të fitojë dy “Unaza të Arta” me këtë skuadër, konkretisht në sezonin 2016-2017 dhe 2017-2018.

Ylli 30-vjeçar do të shfrytëzojë moratoriumin e transferimeve të lira, që nisi pikërisht sot dhe do të përfundojë më datën 7 korrik, për t’u transferuar në New York, te skuadra e Brooklyn Nets.

Durant ka arritur marrëveshjen me Nets, për të nënshkruar një kontratë 4-vjeçare, nga e cila pritet të përfitojë rreth 164 milionë dollarë, ndërsa rikthimi i tij në fushë pritet të ndodhë vetëm gjatë vitit 2020, pasi vuan një dëmtim në thembër, që e pësoi në finalet e këtij sezoni ndaj Toronto Raptors.

Bashkë me Durant, te Brooklyn Nets do të transferohet edhe veterani DeAndre Jordan, një mik i vjetër e 30-vjeçarit, si dhe Kyrie Irving, i cili ka nënshkruar gjithashtu një kontratë 4-vjeçare, me një pagë prej 141 milionë dollarësh.

Këto lëvizje ndryshojnë balancat në NBA, duke renditur mes pretendentëve të Konferencës së Lindjes, skuadrën e Brooklyn Nets, që ka investuar fuqishëm për të sjellë në ekip disa nga emrat më të spikatur të basketbollit në SHBA dhe në botë.