Shtyhet për nesër seanca gjyqësore për rastin e njohur si “Veteranët”

Shtyhet për nesër seanca gjyqësore për rastin e njohur si “Veteranët”

Me kërkesë të mbrojtësit të deputetit Shkumbin Demalijaj, avokatit Arianit Koci, është shtyrë seanca gjyqësore për rastin e shënjestruar për liberalizim të vizave, i njohur si “Veteranët” e cila ishte paraparë që të mbahej sot.

“Me keqardhje ju informoj se seanca në Kuvend ende nuk ka filluar dhe mbetem pranë propozimit për shtyrje të seancës”, tha avokati Arianit Koci, mbrojtës i deputetit Shkumbin Demalijaj, raporton “Betimi për Drejtësi”.

Gjyqtarja Kuka-Mekaj ka thënë se duke pasur parasysh rëndësinë e ligjit për rimëkëmbje ekonomike seanca e sotme duhet të shtyhet për nesër.

“Marrë parasysh për rëndësinë e ligjit për rimëkëmbje ekonomike duhet të shtyhet seanca për nesër”, tha gjyqtarja Kuka-Mekaj

Ajo shtoi se e ka njoftuar përmes zyrtareve ligjor të akuzuarin Shkumbin Demalijaj që duhet të jetë prezent sot e me pas, varësisht nga rrethanat ta lirojnë, por sipas saj, ai nuk ka vepruar kështu.

Ligji për rimëkëmbje ekonomike ka dështuar të miratohet gjashtë herë radhazi, ndërsa sot është hera e shtatë që ky projektligj është dërguar për votim, derisa, në seancën e sotme pro kanë votuar 64 deputetë.

Seanca e radhës pritet të mbahet nesër në ora 9:00.

Në këtë rast, për keqpërdorim të pozitës apo autoritetit zyrtar po akuzohen ish-kryeministri i Kosovës, Agim Çeku, ish-ministri i Mbrojtjes, Rrustem Berisha, deputeti Shkumbin Demalijaj, si dhe nëntë persona të tjerë.

Ata po akuzohen për kohën sa ishin pjesë e Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, Pjesëtarit dhe të Internuarit të Luftës së UÇK-së, raporton “Betimi për Drejtësi”.

Ndryshe, Gjykata Themelore në Prishtinë, më 19 qershor të vitit 2019, e kishte konfirmuar aktakuzën, ndërsa këtë vendim e kishte konfirmuar edhe Gjykata e Apelit në gushtin e këtij viti.

Me aktakuzën e PSRK-së, po ashtu ishte kërkuar që Gjykata Themelore në Prishtinë, që të urdhërohet Ministria e Punës dhe Mirëqenies Sociale (MPMS), që të pezullonte pagesën e pensioneve për 19.500 veteranë, deri në përfundimin e procesit gjyqësor.

Por, më 1 prill 2019, gjykata e kishte refuzuar këtë kërkesë me arsyetimin se propozimi për masën e përkohshme nuk është ndaj të akuzuarve, por ndaj MPMS-së, si palë e tretë.

Sipas aktakuzës së përgatitur nga ish-prokurori special, Elez Blakaj, personat e përfshirë akuzohen se prej vitit 2011 deri në vitin 2017, duke vepruar si anëtarë të Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, Pjesëtarit dhe të Internuarit të Luftës së Ushtrisë Çlirimtare të Kosovës, kanë shfrytëzuar detyrën dhe autoritetin zyrtar, duke tejkaluar kompetencat me dashje dhe duke mos i përmbushur detyrat zyrtare, me qëllim që të përfitojnë personat e tjerë në mënyrë të kundërligjshme, në vazhdimësi, në dëm të Buxhetit të Republikës së Kosovës.

Në këtë aktakuzë janë të përfshirë 12 persona të cilët ngarkohen me veprën penale “keqpërdorimi i pozitës apo autoritetit zyrtar”.

Siç kishte raportuar “Betimi për Drejtësi”, listës së personave të akuzuar i prinë Agim Çeku, i pasuar nga Nuredin Lushtaku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Smajl Elezaj, Fadil Shurdhaj dhe Xhavit Jashari.

PSRK-ja, po ashtu i kishte propozuar kësaj gjykate që ta lëshoj masën për ndalimin  e pagesës së pensioneve të fituara në mënyrë të kundërligjshme si veteran luftëtarë të UÇK-së, deri në përfundimin e procedurës penale..

Tutje, sipas PSRK-së, nga provat e siguruara deri më tani është vërtetuar se nga pagesat e kundërligjshme për veteranët luftëtarë të UÇK-së, buxheti i Republikës së Kosovës është dëmtuar në shumë prej  68.153.533.14 euro.

Ndërsa, me aktakuzën e dorëzuar në gjykatë më 7 dhjetor 2018, pretendohet se buxheti i Republikës së Kosovës është dëmtuar në shumë prej  88.769.217.04 euro. /BetimipërDrejtësi


MË SHUME NGA Betimi për Drejtësi