Peci i zhgënjyer me UNMIK-un dhe EULEX-in për trajtimin e krimeve të luftës

Peci i zhgënjyer me UNMIK-un dhe EULEX-in për trajtimin e krimeve të luftës

Kryetari i Gjykatës Supreme të Kosovës, Enver Peci në një intervistë për “Betimi për Drejtësi” tha se është i pa kënaqur sa i përket gjykimit të rasteve të krimeve të luftës në Kosovë.

Peci theksoi se nuk është i kënaqur në punën e bërë nga UNMIK-u e as EULEX-i, po ashtu ai ka thënë se situatë më e mirë nuk është as prej kur krimet e luftës janë nën kompetencën e gjykatave vendore, raporton “Betimi për Drejtësi”.

Ai  theksoi se një prej arsyeve që nuk ka shumë suksese në trajtimin e rasteve të krimeve të luftës në Kosovë është mungesa e aspekteve profesionale, por edhe numerike.

Peci ka shtuar se disa dëshmi dhe prova është vështirë që t’i marrin pasi kanë vdekur personat pasi sipas tij ka vonuar trajtimi rasteve të krimeve të luftës.

“S’po du me hy në kompetencat se vetëm jam prononcuar një herë. Me ju thanë sinqerisht jam kanë i zhgënjyer me punën edhe të UNMIK-ut edhe të EULEX-it sa i përket trajtimit të këtyre rasteve. Me marrjen e kompetencave të vendorëve e dimë çka kanë lënë dhe çka kanë vepruar në kuptim e asaj sa jam unë i njoftuar më lëndët e prokurorisë. Mirëpo më të vërtetë nuk është mirë edhe prej ne që i kemi marrë kompetencat për shkak se po më duket që po mungojnë edhe aspektet profesionale dhe numerike t’i quaj ashtu të numrit të atyre që duhet me angazhua në këto çështje për shkak se janë çështje voluminoze. Çështje që janë vjetruar në kuptim edhe të marrjes se provave dhe dëshmive.  Njerëzit po shkojnë 20 vite nuk janë pak neve na duhet që jemi gjallë tani por ne kemi dëshmitar apo prova të asaj kohe që edhe me dashtë nuk mundemi me i marrë”, tha ai.

Kryetari i Gjykatës Supreme të Kosovës, Enver Peci ka shtuar se në përgjithësi ka pasur një neglizhencë të shoqërisë në përgjithësi sa i përket trajtimit të rasteve të krimeve të luftës në Kosovë.

Sipas Pecit, nuk ka pasur mekanizëm të themeluar si duhet në aspektin e hetimit edhe të grumbullimit të provave.

“Faktikisht mendoj në kuptimin e përgjithshëm se si shoqëri pak edhe kemi qenë neglizhentë edhe kemi dështuar në përgatitjen e përgjithshme të qytetarëve t’i quaj ashtu edhe të profesionistëve për me e trajtuar këto krime për shkak se nuk ka pas mekanizëm i themeluam si duhet në kuptim edhe të hetimit edhe të grumbullimit të provave. Sidomos me ju thanë të drejtën në vitin 1999 menjëherë pas përfundimit diku në muajin korrik kam fillu me i gjet të pagjeturit, të zhdukurit edhe diku 200 kufoma kam marrë pjesë në zhvarrime me Tribunalin e Hagës që ka pas kompetencë po në atë kohë si shoqëri nuk kem krijuar një mekanizëm në mënyrë që të mbledhim prova, ë mbledhim dëshmi. Unë jam i vetëdijshëm se çfarë kemi mund të bëjmë në atë kohë. Unë kam fillu me një shoqatë ta quaj ashtu, asociacion me punu edhe e kem dëgjua kapak dëshmi edhe kemi mbledh prova, mirëpo nuk ka pas një sistem unik të grumbullimit dhe të orientimit”, tha ia.

Për më tepër ndiqeni intervistën e plotë të kryetarit të Gjykatës Supreme të Kosovës, Enver Peci. /BetimipërDrejtësi


MË SHUME NGA Betimi për Drejtësi