Për shkak të pandemisë, anulohen dy seanca në rastin e njohur si “Stenta 2"
BKT
   Betimi për Drejtësi

Për shkak të pandemisë, anulohen dy seanca në rastin e njohur si “Stenta 2"

Dy seancat e parapara të mbaheshin të hënën dhe të martën në rastin e njohur si “Stenta 2”, janë anuluar për shkak të masave të Qeverisë ndaj pandemisë COVID-19”.

Lajmin për “Betimi për Drejtësi” e ka konfirmuar, gjykatësja e rastit, Shadije Gërguri.

Gjykatësja Gërguri ka thënë se seancat janë anuluar për shkak të zbatimit të vendimit të Qeverisë dhe për shkak të situatës së krijuar me pandeminë COVID-19, raporton “Betimi për Drejtësi”.

“Seancat i kemi anuluar për shkak të zbatimit të vendimit të Qeverisë dhe për shkak të situatës, tash presim vendimin tjetër të qeverisë dhe pastaj e përshtatim një datë për seancën e radhës”, tha gjykatësja.

Ndryshe, për të njëjtën arsye ishte anuluar edhe seanca e 3 shtatorit, me ç’rast ishin caktuar ato të radhës të mbaheshin më 20 dhe 21 shtator.

Me akuzat e PSRK-së në këtë rast, tashmë janë duke u përballur të akuzuarit Gani Bajraktari, Nexhmi Zeqiri, Daut Gorani, Elfedin Muhaxheri, Reshat Emra, Hamza Selmani, Ismajl Avdimetaj, Sali Shala, Nehat Rexhepaj, Agron Besimi, Petrit Ademaj, Bajram Mziu, Agron Leka, Driton Miftari, Besim Guda, Mirdi Strana, Shemsedin Shabollari, Fisnik Hima, Luan Pazhari, Galina Berisha, Bajram Preteni, Lulzim Kamberi, Faik Shatri, Ejup Pllana, Florim Sadiku, Halim Halili, Agim Krasniqi, Hajdin Çitaku, Edmond Haliti, Besnik Koliqi, Afrim Poniku, Banush Gashi, Nebih Musliu, Dardan Koqinaj, Xhevdet Krasniqi, Lazër Prekpalaj, Rexhep Manaj, Kelmend Pallaska dhe Arlind Batalli.

Për gjashtë prej tyre, përkatësisht për të akuzuarit Elfedin Muhaxheri, Nexhmi Zeqiri, Ferid Susuri, Ferihane Sefa, Masar Gashi dhe Murat Abazi, për shkaqe shëndetësore, procedura është veçuar, ashtu që tanimë ata po gjykohen veçmas nga të akuzuarit tjerë.

Ndryshe, në këtë rast ishin të përfshirë edhe ish-ministri i Shëndetësisë (MSH), Ferid Agani, ish-sekretari i MSH-së, Gani Shabani dhe 11 të akuzuar të tjerë, mirëpo rasti ishte veçuar në tri pjesë në shqyrtimin fillestar.

Veprat penale për të cilat ngarkohen nga PSRK-ja të akuzuarit në rastin “Stenta 2”, janë “keqpërdorimi i pozitës apo autoritetit zyrtar” dhe “marrje ryshfeti”.

Sipas aktakuzës së PSKR-së, ekziston dyshimi i bazuar mirë se nga 1 janari 2011 e deri më 31 dhjetor 2015, duke vepruar në bashkëkryerje nga pozita e mjekëve në SHSKUK, kanë keqpërdorur pozitat dhe autoritetin e tyre zyrtar, në atë mënyrë që duke i tejkaluar kompetencat e tyre si anëtarë të komisioneve konziliare të Klinikës së Kardiologjisë, me dashje dhe dijeni ua kanë lëshuar letrat referuese për trajtim jashtë institucioneve publike shëndetësore së paku 233 persona edhe pse të njëjtit i kishin kryer trajtimet mjekësore.

Sipas aktakuzës, një gjë e tillë ishte bërë që personave në fjalë t’ua mundësonin kompensimin e shpenzimeve nga Ministria e Shëndetësisë për trajtim mjekësor në institucione private edhe pse, siç thotë aktakuza, në bazë të nenit 53 të Ligjit mbi Shëndetësinë, Nr.2004/04, të 19 shkurtit 2014 dhe neneve 16 dhe 25 të Ligjit për Shëndetësinë Nr.04/L-125 të 13 dhjetorit 2012, letra referuese duhej t’u lëshohej pacientëve në momentin kur konstatohej se pacientët nuk kishin mundësi të trajtoheshin brenda sistemit publik shëndetësor.

Me këto veprime të të akuzuarve, PSKR pretendon se dëmi që i është shkaktuar buxhetit të Kosovës është 4 milionë, e 555 mijë e 552 euro.

Po ashtu, aktakuza i ngarkon mjekët në rastin “Stenta 2” se kanë keqpërdorur pozitën zyrtare dhe kanë marrë ryshfet, ashtu që, në vend se pacientët që kanë shkuar për kontroll në institucione publike shëndetësore, t’i referonin në njësinë kompetente invazive në Klinikën Kardiologjike në SHSKUK në Prishtinë, të njëjtit pacientët i kanë referuar në spitale private dhe për këto veprimet kanë marrë ryshfet.

Sipas aktakuzës, për çdo pacient që e dërgonin për vendosjen e stentave, merrnin nga 500 euro ryshfet, ndërsa për koronarografi merrnin nga 150 euro ryshfet.

Sipas PSRK-së, të akuzuarit i kishin kryer këto veprime në bashkëpunim me të akuzuarit që tashmë janë të përfshirë në rastin “Stenta 3”, ku janë kryesisht pronarë e mjekë të spitaleve private.

Më 15 qershor 2016, Prokuroria kishte ngritur aktakuzë kundër ish-ministrit të Shëndetësisë, Ferid Agani, ish-sekretarit të përgjithshëm të Ministrisë së  Shëndetësisë, Gani Shabani dhe 62 personave të tjerë, për veprat penale “keqpërdorimi i pozitës apo autoritetit zyrtar”, “marrje e ryshfetit”, “dhënie e ryshfetit”, “trajtimi i pandërgjegjshëm mjekësor”, “ushtrimi i kundërligjshëm i veprimtarisë mjekësore dhe farmaceutike” dhe “shmangia nga tatimi “.

Në ndërkohë, prokuroria kishte hequr dorë nga ndjekja penale ndaj kardiologut Afrim Bekteshi, me arsyetimin se i njëjti është përfshirë gabimisht në aktakuzë.

Në ketë çështje penale, hetimet fillimisht janë zhvilluar kundër 116 personave fizik dhe 4 personave juridik. Mirëpo, për 56 persona fizik nuk janë plotësuar kushtet ligjore që të përfshihen në këtë aktakuzë, andaj për të njëjtit janë pushuar hetimet.

Mbrojtja e të akuzuarve ka ngritur dilema të shumta rreth ligjshmërisë së kësaj aktakuze, e cila sipas tyre, përveç se përmban prova të papranueshme ajo është ngritur në mënyrë të kundërligjshme nga prokurori i Zyrës së Kryeprokurorit të Shtetit, Besim Kelmendi.

Sipas mbrojtjes, Zyra e Kryeprokurorit të Shtetit nuk ka kompetenca në ngritjen e aktakuzave siç ka ndodhur në këtë rast. /BetimipërDrejtësi


MË SHUME NGA    Betimi për Drejtësi