Vitia viziton qendrën tregtare, zbulon planin investues për polet ekonomike
Kandidati për Kryetar të Prishtinës nga Lëvizja VETËVENDOSJE!, Arben Vitia sot në mëngjes bashkë me ekipin e tij e kanë vizituar Bregun e Diellit, lokalet përreth dhe hapësirën e qendrës tregtare që është në lagje.
Në diskutim me banorët dhe bizneset e vogla në këtë lagje, Vitia është informuar prej afër për problemet me të cilat ballafaqohen banorët dhe bizneset e kësaj lagjeje të rëndësishme të kryeqytetit.
“Në kuadër të investimit në polet ekonomike të qytetit, do të investohet edhe në qendër tregtare si një hapësirë e rëndësishme komerciale për gjithë qytetin. Dhe këtë do ta bëjmë përmes NPB-së. Do të rregullohen hapësirat e përbashkëta, duke i funksionalizuar shkallët elektrike, ndriçimin, por edhe duke e bërë më atraktive qendrën për brende të ndryshme të njohura” ka thënë Arben Vitia.
Në prani të qytetarëve, Vitia e ka zbuluar planin e tij për lagjen e Bregut të Diellit si dhe detajet e programit të tij për investimet përcjellëse që do të bëhen gjatë mandatit të tij si Kryetar i Komunës së Prishtinës.
Në fund, Vitia i ka ftuar të gjithë qytetarët që të dalin në raundin e dytë të zgjedhjeve që do të mbahen më 14 nëntor, për t’i jetësuar ndryshimet e nevojshme të cilat do ta përmirësojnë cilësinë e jetës në Prishtinë, për të gjithë qytetarët.























