Mbyllet për publikun seanca e “Syrit të Popullit”
Sharr Travel

Mbyllet për publikun seanca e “Syrit të Popullit”

Me propozim të prokurorit Burim Cerkini, të premten është mbyllur për publikun gjykimi në rastin “Syri i Popullit”, për pjesën ku do të diskutohet për dëshmitarët anonim. Propozimi i prokurorit është përcjellë me polemika, ku ndër të tjera i akuzuari Sadri Ramabaja i ka thënë se është pjesë e krimit, por më pas e ka tërhequr këtë deklarim.

Në këtë rast, Avni Llumnica akuzohet për tentim vrasje të Azem Vllasit në bashkëkryerje me tani të ndjerin M.J., ndërsa Sadri Ramabaja akuzohet se kishte ndihmuar të akuzuarit në kryerjen e veprës penale të vrasjes në tentativë, raporton “Betimi për Drejtësi”.

Në fillim të seancës, prokurori Burim Cerkini ka thënë se para se të fillojë seanca ka një propozim, e propozimi i tij ishte që të mbyllej për publikun e njëjta.

“Duke marrë për bazë se kjo çështje penale është bërë mjaft publike dhe mediatike. Gjithashtu duke marrë për bazë se në këtë çështje penale do të dëgjohen dëshmitarët anonim a2 dhe a3 për shkak të konfidencialitetit dhe ruajtjes së asaj që do të dëgjohet dhe propozohet në këtë seancë që seanca e sotme të mbyllet për publikun dhe për median”, ka thënë ai.

Ndërkaq, kryetari i trupit gjykues, Musa Konxheli i tha të njëjtit se ata nuk kanë informacion nëse janë siguruar dëshmitarët.

Për këtë, prokurori tha se kjo është arsyeja pse po propozohet mbyllja e seancës për publikun dhe mediat.

Më, pas gjykatësi Konxheli sërish e ka pyetur nëse janë diku dëshmitarët.

“Le të vendoset për publikun pastaj. Ka të bëjë me çështje konfidenciale dhe të ndjeshme dhe me çështje që ditët e fundit është bërë mediatike”, tha prokurori.

Ndërkaq, përfaqësuesi i palës së dëmtuar, avokati Nasuf Hasani deklaroi se e përkrahin propozimin e prokurorit pasi si organ kompetent konsideron se kanë bërë një vlerësim për këtë propozim. Këtë deklarim e mbështeti edhe pala e dëmtuar, Azem Vllasi.

Mirëpo, propozimin e prokurorit e kanë kundërshtuar dy avokatët mbrojtës, Naim Rudari e Ramiz Krasniqi.

Rudari që është avokat i Avni Llumnicës deklaroi se vlerësojnë se prokurori nuk e ka arsyetuar mjaftueshëm se pse duhet të mbyllet seanca.

“Edhe pse dëshmitarët e mbrojtur e kanë identitetin e dëshmitarit të mbrojtur, nuk ka thënë që do të zbulojë identitetin e tyre a diçka tjetër, është fakt i njohur se janë të mbrojtur kanë deklaruar, dhe çkado tjetër që do të thotë prokuroria”, tha ai.

I njëjti shtoi se nuk është sekrete se a do të vinë apo jo dhe se sipas tij, është e paarsyeshme të mbyllet seanca.

Në anën tjetër, avokati Ramiz Krasniqi, mbrojtës i Sadri Ramabajës, deklaroi se janë dy çështje për të cilat nuk pajtohet me prokurorin.

“E para, seancat e mbyllura nuk janë seanca gjyqësore. Pastaj, prokurori nuk e kemi të qartë a kërkon që të mbyllen seancat për deklaratat që do të japin dëshmitarët e mbrojtur apo kërkon që të mbyllet që dëshmitarët të mos duken”, tha Krasniqi.

I njëjti shtoi se prokurori tha se kohën e fundit kjo çështje është bërë mediatike, kjo sipas tij nuk është e saktë sepse kjo çështje është mediatike prej momentit kur e kanë krijuar një grup kriminal.

Për këtë, ndërhyri prokurori Cerkini, i cili iu drejtua duke i thënë të ketë kujdes me fjalorin, në anën tjetër avokati Krasniqi i tha se nuk iu drejtua atij por prokurorisë, e prokurori sërish ia tërhoqi vërejtjen për fjalorin.

“Nuk kujdesem, dhe keni theksuar se ky grup kriminal është krijuar me qëllim që të përmbys sistemin politik në Kosovë. Gjykata e Apelit ju ka treguar qartë se keni gabuar rëndë dhe për këtë duhet tu kërkoni falje të gjithë të akuzuarve”, ka thënë ai.

Kurse, i akuzuari Ramabaja tha se e përkrah mbrojtësin e tij dhe se ka deklaruar që në fillim edhe të këtij shqyrtimi gjyqësor se në shqyrtimin paraprak beteja juridike ishte e fituar nga ana e tij.

“Natyrisht Gjykata e Apelit nuk rrëshqiti në batakun e krimit shtetëror që kishte përgatitur kreu i shtetit me kreun e AKI-së dhe PSRK. Unë sot kam pritur pak profesionalizëm dhe ndërgjegje morale nga ana e prokurorit dhe kam pritur që ai sot do të më kërkonte falje publikisht pse e kanë ngritur këtë akuzë mbi sajesa të një grupi kriminal që kishte kapur shtetin”, tha ai.

Ramabaja shtoi se meqë nuk e bëri, i njëjti supozon që edhe ai është pjesë e këtij krimi.

E këtu i ka ndërhyrë kryetari i trupit gjykues, duke i thënë “ jo, jo, jo”, e më pas Ramabaja tha se kërkon të përjashtohet prokurori.

“Kjo është pjesë e këtij krimi, duhet me tërheq menjëherë”, ka thënë gjykatësi Konxheli.

Më pas, avokati Krasniqi tha se e tërheq në emër të klientit të tij këtë pjesë të deklarimit, ndërkaq gjykatësi Konxheli tha se fjalia e fundit nuk lejohet.

“Zoti gjykatës ndihuni pak në vendin tim, keni parasysh dëmin moral publik e material që më është shkaktuar”, tha Ramabaja.

E gjykatësi Konxheli i tha të mos përdor fjalë që nuk lejohen, Ramabaja më pas tha se e tërheq pjesën ku i tha prokurorit se është pjesë e krimit e ndër të tjera tha se pret njerzillëk nga prokurori.

Në anën tjetër, prokurori Cerkini deklaroi se kjo është  diçka që nuk është korrekte.

“E bëmë një propozim, është trupi gjykues që vendos të kemi një vendim prej trupit gjykues dhe pastaj vazhdojmë. Unë mendoj që çështja ka të bëjë me dy dëshmitarë që janë anonim dhe jo dëshmitarë të mbrojtur, t’i dallojmë konceptet, janë anonim të shpallur nga gjykata”, ka thënë ai.

Tutje, tha se arsyeja pse do të mbyllet kjo seancë është që ka element për të njëjtit dëshmitar dhe nuk po e thekson çka do të thotë pa marrë vendim nga trupi gjykues.

“Do të thoni diçka që nuk duhet me ditë publiku”, pyeti Konxheli, e prokurori konfirmoi këtë.

Pas këshillimit, trupi gjykues u kthye në sallë dhe pyeti Ramabajën nëse i qëndron kërkesës për përjashtimin e prokurorit, por ky i fundit e tërhoqi të njëjtën.

Më pas, ata bënë të ditur se aprovohet propozimi i prokurorit për përjashtimin e publikut nga një pjesa e seancës për dëshmitarët anonim a2 dhe a3.

Në këtë çështje penale, në cilësinë e të akuzuarit ka qenë edhe Bajrush Konjusha, mirëpo ai pas pranimit të fajësisë për armëmbajtje pa leje, është dënuar me 300 euro gjobë.

Ndryshe, ky rast kishte marrë epilog në janar të vitit 2020, kur Gjykata Themelore në Prishtinë i kishte shpallur fajtor të akuzuarit, por pas ankesave të ushtruara, Gjykata e Apelit e kishte kthyer rastin në pikën zero.

Duke vepruar konform rekomandimeve të Apelit, PSRK kishte ngritur aktakuzë të re në këtë rast.

Sipas aktakuzës së datës 27 tetor 2020, Sadri Ramabaja, Avni Llumnica dhe Bajrush Konjusha janë tashmë të vetmit të akuzuar në këtë rast.

Kjo pasi që PSRK heqë dorë nga vepra penale kundër rendit kushtetues respektivisht nga dyshimi për ekzistimin e një grupi kriminal “Syri i Popullit”.

Me aktakuzën e re, Llumnica akuzohet se në bashkëkryerje me tani të ndjerin M. J. kishin tentuar të privojnë nga jeta, Azem Vllasin.

Ramabaja akuzohet se kishte ndihmuar Llumnicën dhe M.J të kryejnë atentat ndaj të dëmtuarit Azem Vllasi, ndërkaq Bajrush Konjusha akuzohet për veprën penale të armëmbajtjes.

Lidhur me akuzën ndaj të ndjerit M.J, sipas vendimit të Apelit, meqenëse i njëjti kishte probleme shëndetësore, rasti i tij ishte deleguar në Prokurorinë Themelore në Prishtinë, e cila kishte ushtruar propozim për caktimin e masës së trajtimit të detyrueshëm psikiatrik.

Ndryshe, Prokuroria Speciale e Republikës së Kosovës (PSRK), më 27 shkurt 2018 kishte ngritur aktakuzën e parë për këtë rast.

Avni Llumnica, Ragip Sallova, Sadri Ramabaja, Sabit Berisha, Behxhet Luzha, Halim Halimi, Bajrush Konjusha, Lirije Luzha dhe Rexhep Topllana akuzoheshin për vepra të ndryshme penale.

Sipas kësaj aktakuze, i pandehuri Avni Llumnica me dashje që tani i ndjeri M.J. të vriste për hakmarrje të dëmtuarin Azem Vllasin, i kishte dhënë ndihmë M.J në kryerjen e veprës penale.

Llumnica thuhet se më 6 mars 2017, e kishte sjell nga Zvicra në Kosovë tani të ndjerin M.J., e kishte ftuar në shtëpinë e tij, ndërsa një ditë më vonë e kishte dërguar në motel “Fontana” në Veternik, ku ia kishte paguar edhe fjetjen në këtë motel.

Ndërsa, sipas pretendimeve të Prokurorisë, kur i pandehuri, tani i ndjeri M. J. kishte kryer vepër penale ndaj Azem Vllasit, ai bashkë me të akuzuarin Llumnica ishin takuar në qytet dhe pasi që kishin dashur të largoheshin për në shtetin e Zvicrës, në orën 12 të mbrëmjes ishin arrestuar nga Policia e Kosovës.

Me këtë, Llumnica akuzohej se kishte kryer veprën penale “hakmarrje në ndihmë” nga neni 396, i Kodit Penal.

Llumnica sipas kësaj aktakuze, sa ishte në Qendrën e Paraburgimit në Lipjan më 16 maj 2017 thuhet se duke përdorur kanosjen dhe forcën ka dhunuar të dëmtuarin N.Z duke e futur në banjo të dhomës së paraburgimit dhe duke e detyruar të njëjtin që t’i bëj seks oral. Sipas akuzës Llumnica edhe para se të ndodhte rasti disa ditë më parë e kishte ngacmuar seksualisht të dëmtuarin në fjalë.

Për këtë, Llumnica akuzohej për veprën penale “Dhunim” nga neni 230 i Kodit Penal.

Të pandehurit M. J., Avni Llumnica, Ragip Sallova, Sadri Ramabaja, Rexhep Topalla, Bajrush Konjusha, Sabit Berisha, Halim Halimi, Bexhet Luzha dhe Lirije Luzha, pretendohej se më 15 maj 2017, siç thuhet në aktakuzë, ishin pjesë e organizatës kriminale “Syri i Popullit”, me të ashtuquajturin “Avni Rrustema” diku në një shtet të Evropës kishin filluar aksionet e kundërligjshme me qëllim që të destabilizonin ose shkatërronin strukturat themelore politike, ekonomike dhe kushtetuese të Republikës së Kosovës.

Sipas aktakuzës, të njëjtit thuhet se kishin planifikuar sulme dhe vrasje ndaj personaliteteve të lartë shtetëror të konsideruar si ish-funksionarë të viteve 1980-1991 si tradhtar të vendit. Këto sulme, sipas aktakuzës, ata kishin planifikuar t’i kryenin ndaj presidentit të Kosovës Hashim Thaçi, kryetarit të Kuvendit Kadri Veseli, ish-kryeministrit Isa Mustafa, ish-ministrit Hajredin Kuçi, Xhavit Haliti, Fatmir Limaj duke vazhduar me komandantë të luftës së UÇK-së, drejtorin e ATK-së, klerikët fetarë, etj.

Sipas akuzës, ky grup me qëllim të vrasjes së këtyre personave që i konsideronin si tradhtar kishin themeluar fondin “Liria e Atdheut” dhe si organizatë “Syri i Popullit” kishin një strukturë të ndarë në bazë të hierarkisë, kishin emra të koduar dhe detyra të ndara thuhet ndër tjera në aktakuzë.

Ndërsa, i pandehuri, tani i ndjerë, M.J. thuhet se kishte tentuar të vriste Azem Vllasin si ish-funksionar i cili sipas tyre ishte vlerësuar si i pari në listën e tradhtarit të vendit.

Me këtë, ata akuzoheshin se kishin kryer veprën penale “përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës” nga neni 144, i Kodit Penal.

I pandehuri Bajrush Konjusha, akuzohej edhe për veprën penale “mbajtja në pronësi, kontroll ose posedim të paautorizuar të armëve”, pasi që me rastin e bastisjes në shtëpinë e tij ishte konfiskuar një pistoletë e gazit dhe një pushkë ajrore me diabolla 250 copë.

Ndërsa, i ndjeri M.J. nga PSRK-ja, ngarkohej me veprat penale “hakmarrja” dhe “mbajtja në pronësi, kontroll ose posedim të paautorizuar të armëve”.

Prokuroria e akuzonte M.J. që duke qenë në gjendje të paaftësisë mendore për t’i kuptuar dhe kontrolluar veprimet e veta për shkak të sëmundjes nga çrregullimi skizoafektiv-tipi maniak, me karakter të përhershëm, më 13 mars 2017 ka shkuar në banesën e të dëmtuarit Azem Vllasi në Prishtinë, që ta privojë nga jeta si ish-udhëheqës i lartë i LKJ-së dhe ish-udhëheqës i Kosovës, duke e konsideruar të njëjtin si tradhtar për shkak të qëndrimeve të tij lidhur me demonstratat e vitit 191 dhe çështjes kombëtare.

Tutje, në aktakuzë thuhet se M.J., fillimisht është interesuar që Vllasin ta angazhojë si avokat në çështje civile, ndërsa ai i ka thënë se nuk merret me çështje civile, duke e sugjeruar të drejtohet te një avokat tjetër dhe pas kontaktit të dytë me të, i akuzuari e ka nxjerrë pistoletën e tipit “Crvena Zastava”, me shurdhues duke ia drejtuar në ballë të dëmtuarit.

Me tej, prokuroria pretendon se Vllasi ia ka kapur pistoletën të ndjerit M.J. dhe e ulur, që ka ndikuar që plumbi ta godet Vllasin në pjesën e majtë të kraharorit, duke i shkaktuar lëndime të rënda trupore. Pas kësaj, J. kishte tentuar edhe njëherë të shkrep me armë në drejtim të viktimës, por iu kishte bllokuar arma dhe më pas ishte larguar nga vendi i ngjarjes, për t’u takuar me të pandehurin Avni Llumnica, për tu arrestuar nga polica në motel “Fontana”, në Veternik.

Sipas aktakuzës, pasi policia kishte bërë një kontroll në motel “Fontana”, te i ndjeri M.J ishte gjetur dhe konfiskuar një pistoletë e tipit “Crvena Zastava”, model 70 e kalibrit 70-65 mm, me shurdhues dhe një karikator me 7 fishekë, që e ka përdorur pa leje.

Për këtë aktakuzë, Gjykata Themelore në Prishtinë, udhëhequr nga kryetarja e trupit gjykues, Naime Krasniqi – Jashanica dhe gjykatësit Vesel Ismajli dhe Valbona Musliu – Selimaj, kishin marrë aktgjykim me të cilin të akuzuarit i kishte shpallur fajtorë.

Sadri Ramabaja, M. J., Ragip Sallova, Avni Llumnica, Bexhet Luzha, Halim Halimi, Bajrush Konjusha dhe Rexhep Topllana, në janar të vitit 2020 ishin shpallur fajtorë për vepra penale kundër rendit kushtetues dhe vepra të tjera penale.

Avni Llumnica për veprën penale të hakmarrjes është dënuar me 3 vjet burg, për dhunim 1 vit, kurse për shkak të veprave terroriste 10 vjet burg, kurse më pas ndaj tij është shpallur dënim unik prej 12 vjetësh burgim. Atij do t’i llogaritet edhe koha në paraburgim dhe i konfiskohet vetura “BMË”, me targa te huaja.

Për vepra penale terroriste, Sadri Ramabaja ishte dënuar me 5 vjet burg, kurse për të njëjtën vepër penale, i akuzuari Ragip Sallova ishte dënuar me 4 vjet burg, ndërsa Rexhep Topllana ishte dënuar me 2 vjet.

Të ndjerit M. J. për shkak të gjendjes së tij, gjykata i kishte shqiptuar atij trajtim të detyrueshëm psikiatrik në kohëzgjatje prej 10 vjetësh.

Behxhet Luzha për mos lajmërim të veprës penale ishte dënuar me 2 vjet burg.

Halim Halimi dhe Bajrush Konjusha ishin dënuar me nga 3 vjet burg. Përveç me burg, Konjusha me 300 euro gjobë për armëmbajtje pa leje.

Për të akuzuarit Sabit Berisha dhe Lirije Luzha ishte refuzuar aktakuza, pasi që prokurori kishte hequr dorë nga ndjekja penale.

Por me konstatimet e Gjykatës Themelore nuk ishte pajtuar Gjykata e Apelit, e cila çështjen e kishte kthyer në rigjykim, madje kishte kërkuar që rasti të kthehet nga shqyrtimi fillestar për shkak të shkeljeve të paevitueshme.

Në aktvendimin e Apelit thuhet se “çështja penale kthehet në rivendosje për t’u proceduar nga shqyrtimi fillestarë dhe pas rregullimit të aktit akuzues”.

Ky aktvendim kishte bërë që Prokuroria Speciale të paraqes pas disa muajve një aktakuzë të re dhe me shumë ndryshime. /BetimipërDrejtësi


MË SHUME NGA Betimi për Drejtësi