Arrestohet ish-kryeministri Borisov
Lideri i partisë GERB dhe ish-kryeministri Bojko Borisov është arrestuar nga policia, njoftoi dje në mbrëmje vonë Ministria e Brendshme bullgare, sipas agjencisë bullgare të lajmeve, BTA.
”Një operacion në shkallë të gjerë të zbatimit të ligjit është duke u zhvilluar në lidhje me 120 raste të Zyrës së Prokurorit Publik Evropian (EPPO) në Bullgari”, thuhet në një njoftim për shtyp të saj.
Në shumë vende po kryhen kontrolle dhe sekuestrime.
Përveç Borisovit, autoritetet thanë gjithashtu se kanë arrestuar ish-ministrin e tij të Financave, Vladislav Goranov, ish-kryetaren e Komitetit të Buxhetit dhe Financave të Asamblesë Kombëtare Menda Stoyanova dhe këshilltaren aktuale të GERB-it për media, Sevdalina Arnaudova.
“Askush nuk është mbi ligjin”, shkroi kryeministri Kiril Petkov në një postim në Facebook.
Menko Menkov, avokati i Borisovit, tha se nuk ishte në dijeni pse u arrestua ish-kryeministri.
Koordinatori kombëtar i GERB, Nikola Nikolov u tha gazetarëve se GERB ka informuar liderin e Partisë Popullore Evropiane (EPP), Manfred Weber dhe sekretarin e përgjithshëm të PPE, Antonio López-Istúriz, për atë që po ndodh me Bojko Borisov dhe anëtarët e partisë së tij në Bullgari.
Ndërkohë, deputetja e GERB Desislava Atanasova kërkoi dorëheqjen e ministrit të Brendshëm Bojko Rashkov.
Deputetja e GERB-it, Tsveta Karajançeva, tha se partia e saj ka qenë subjekt i represioneve që nga zgjedhjet e fundit parlamentare. Nënkryetari i GERB-it, Daniel Mitov tha se Borisovi është kontrolluar afërsisht vonë duke përdorur metodat e Gestapos.
Operacioni policor erdhi pas ditës së dytë të vizitës së kryeprokurores evropiane Laura Kovesi në Bullgari, e cila tha të mërkurën se Këshilli bullgar i Ministrave do të jetë një pikë kontakti për Zyrën e Prokurorit Publik Evropian (EPPO).
“Kjo është një shenjë e qartë e një angazhimi të fortë në nivelin më të lartë”, tha ajo.
Kovesi tha gjithashtu se EPPO ka marrë një numër rekord ankesash, në bazë të të cilave kanë filluar mbi 120 hetime, të cilat kanë të bëjnë me alarmet për shkeljet në lidhje me fondet e BE-së, prokurimet publike, mashtrimet e subvencioneve bujqësore, në sektorin e ndërtimit dhe rikuperimin e fondeve të COVID-19./atsh























