Estonia do t’i mbyllë të gjitha pikat e kalimit kufitar me Rusinë nga 1 dhjetori, pas dëshmive se Shërbimi i Inteligjencës Ushtarake Ruse (GRU) ka urdhëruar një sulm sabotues ndaj një kompanie të industrisë së mbrojtjes në Estoni.

Kështu ka bërë të ditur ministri i Jashtëm i Estonisë, Margus Tsahkna, përmes një postimi në platformën X.

Ai ka thënë se Rusia duhet ta kuptojë se veprimet armiqësore ndaj Estonisë do të kenë pasoja.

Sipas Tsahknas, mbyllja e pikave kufitare do të zvogëlojë mundësinë e Rusisë për të kryer aktivitete armiqësore në Estoni dhe do të forcojë përpjekjet për të parandaluar shmangien e sanksioneve.

Ministri ka bërë të ditur se për këtë vendim i ka informuar homologët e tij nga Finlanda, Letonia dhe Lituania.