Ekstradohet në SHBA lideri famëkeq i drogës
Ardiana Gashi/RTK
Presidenti kolumbian ka njoftuar se kanë ekstraduar në SHBA liderin e bandës më të madhe të krimit në këtë shtet. Otoniel do të përballet me akuzat për trafik droge.
Presidenti kolumbian ka njoftuar se kanë ekstraduar në SHBA liderin e bandës më të madhe të krimit në këtë shtet.
Sipas presidentit kolumbian, Dairo Antonio Úsuga, i njohur si Otoniel, ishte trafikanti më i rrezikshëm në botë.
Ai udhëhoqi kartelin e Klanit të Gjirit dhe kërkohet në SHBA për akuzat e trafikimit të drogës.
Kapja e tij në tetor i dha fund një gjuetie shtatëvjeçare, ndërsa muajin e kaluar Gjykata e Lartë e Kolumbisë miratoi ekstradimin.
Sipas autoriteteve kolumbiane, klani i Gjirit trafikonte rreth 180 deri 200 tonë kokainë në vit. Duke shpallur ekstradimin, presidenti kolumbian e krahasoi Otoniel me bosin famëkeq kolumbian të
drogës Pablo Escobar.
Për informacion për vendndodhjen e tij, qeveria kishte ofruar një shpërblim prej 800 mijë dollarësh, ndërsa SHBA kishte vendosur një shpërblim prej 5 milionë dollarësh për kokën e tij.
Klani i Gjirit besohet se ka rreth 1800 anëtarë të armatosur, të cilët janë rekrutuar kryesisht nga grupet paraushtarake të ekstremit të djathtë. Anëtarët janë arrestuar në Argjentinë, Brazil,Honduras, Peru dhe Spanjë.























