Familjarët e viktimave të Spitalit në Tetovë, ende presin drejtësi (Video)
Besnik Iseni/RTK/Shkup
Prokuroria në Maqedoninë e Veriut ka ngritur kallëzim penal, 1 vit pas shpërthimit të zjarrit në spitalin modular, atje ku humbën jetën 14 persona, të gjithë shqiptarë.
Prokuroria Themelore e Tetovës ka ngritur kallëzim penal për ish-drejtuesit e Spitalit të Tetovës, lidhur me zjarrin që shpërtheu në spitalin modular, në shtator të vitit të kaluar,me ç'rast humbën jetën 14 persona,të gjithë shqiptar.
Sipas prokurorisë, ish drejtori i Spitalit të Tetovës, Florin Besimi, udhëheqësi i modulares dhe mjekët kujdestarë ,do të ndiqen për veprën penale,rrezikim të sigurisë së përgjithshme, përkatësisht për mos vendosjen e aparateve kundër zjarrit.
Njëri prej dëshmitarve, i cili humbi edhe nënën e tij, në këtë ngjarje tragjike ,thotë se, nëse gjykata e vendit nuk merr vendim të drejtë, drejtësinë do ta kërkojnë në gjykatat ndërkombëtare.
“Edhe pse gati janë bërë 10 muaj që kur ka ndodhur rasti, nuk ka gjykim transparent e të drejtë. Po presim dhe shpresat nuk i humbim se do të ketë gjykim të drejtë.Nuk dorëzohemi asnjëherë për këtë rast, Do të shkojmë edhe në Gjykatën e Strasburgut”, thotë Mumin Ismaili, dëshmitar i kësaj tragjedie.
Raporti i krim-teknikës kishte vlerësuar që zjarri që mori jetën e 14 personave në spitalin modular të Tetovës ishte shkaktuar nga një lidhje e shkurtë e qarkut elektrik ku ishte i lidhur defibrilatori.























