Nisen dy anije të tjera nga Ukraina me produkte bujqësore
Foto: Rel
Rajoni dhe Bota

Nisen dy anije të tjera nga Ukraina me produkte bujqësore

REL

Dy anije të tjera që transportonin mallra bujqësore janë nisur nga portet ukrainase të Detit të Zi, duke e çuar në 10 numrin e anijeve që janë nisur javën e kaluar në bazë të një marrëveshjeje të ndërmjetësuar ndërkombëtarisht me Rusinë për të zhbllokuar eksportet bujqësore ukrainase.

Sacura, e cila lundroi nga Pivdeni, po transporton 11.000 tonë sojë në Itali, njoftoi sot Ministria turke e Mbrojtjes, ndërsa Arizona, e cila lundroi nga Chornomorsk, po transporton 48.458 ton misër në Iskenderun në Turqinë jugore.

Katër anijet që u nisën dje nga Ukraina, pritet të ankorohen sonte pranë Stambollit, sipas të njëjtit burim, i cili shtoi se do të inspektohen nesër.

Ministri i infrastrukturës i Ukrainës, Oleksandr Kubrakov, konfirmoi se të dyja anijet ishin larguar dhe shtoi se Pivdeni, porti i tretë ukrainas i përfshirë në marrëveshje, tani ishte në gjendje funksionimi si pjesë e nismës.

Kubrakov kishte thënë më parë se hapja e portit të Pivdenit, i vendosur në qytetin Yuzhne, do të çonte kapacitetin total të eksportit të Ukrainës deri në 3 milionë tonë në muaj.

Ukraina, një nga eksportuesit më të mëdhenj në botë të drithërave, ishte detyruar të ndalonte pothuajse të gjitha dërgesat në vazhdën e pushtimit rus që nisi në shkurt për shkak të një bllokade nga flota ruse e Detit të Zi.

Ndalimi i dërgesave të drithërave nga Ukraina kontribuoi në një rritje të çmimeve globale të ushqimeve dhe shkaktoi shqetësim në lidhje me vendet në Lindjen e Mesme dhe Afrikë që merrnin mjaftueshëm grurë dhe mallra të tjera për të ushqyer popullsinë e tyre.

Për të mbikëqyrur eksportet e drithit ukrainas, një qendër e përbashkët koordinimi në Stamboll nisi punën zyrtarisht më 27 korrik, e përbërë nga përfaqësues nga Turqia, OKB-ja, Rusia dhe Ukraina, për të mundësuar transportin e sigurt nga anijet tregtare të mallrave ushqimore komerciale dhe plehrave nga tre portet ukrainase të Detit të Zi.

Më 7 gusht, Papa Françesku përshëndeti rifillimin e eksporteve të grurit si "një shenjë shprese" që tregoi se dialogu ishte i mundur për t'i dhënë fund luftës.


MË SHUME NGA Rajoni dhe Bota