Mbreti Charles III sonte i drejtohet kombit për herë të parë si monark
BKT
Foto: RTKLive
Rajoni dhe Bota

Mbreti Charles III sonte i drejtohet kombit për herë të parë si monark

Jeton Musliu/RTKlive

Mbreti Charles III pritet t`i drejtohet kombit për herë të parë si sovran i vendit, sot në orën 18:00 (ora 19:00 sipas kohës në Kosovë).

Adresimi i tij si mbret bëhet pas vdekjes së mbretëreshës Elizabeth II.

Monarkja më jetëgjatë e Britanisë së Madhe,  vdiq të enjten qetësisht e rrethuar nga familja e saj, në Balmoral të Skocisë.

Mbreti Charles III, ka mbërritur në Londër, ku më vonë do të takohet edhe me kryeministren Liz Truss.

Mbretëria e Bashkuar po i bën nderime shërbimit të mbretëreshës duke shkrepur në ajër me armë të zjarrit dhe me kambanat e kishave që po bien .

Deputetët u mblodhën për t'i bërë homazhe, përfshirë kryeministren Truss e cila mbretëreshën përshkroi si "një nga udhëheqëset më të mëdhenj që bota ka njohur ndonjëherë".

Udhëheqësi i laburistëve Sir Keir Starmer tha se vdekja e saj "i rrëmben vendit pikën më të qetë, komoditetin më të madh, pikërisht në një kohë kur ne kemi më shumë nevojë për to".

Ish-kryeministri Boris Johnson, i cili takoi Mbretëreshën në Balmoral të martën për ta dorëzuar detyrën e kryeministrit, e përshkroi mbretëreshën si "Elizabeta e Madhe", duke shtuar se ajo "kishte punuar shumë për të mirën e vendit të saj, jo vetëm për tani, por edhe për brezat që do të vijnë".

Charles do të shpallet zyrtarisht Mbret në Këshillin e Aderimit në orën 10:00  të shtunën, në një ceremoni të transmetuar për herë të parë në televizion.

Pallati Buckingham deklaroi se aty do të marrin pjesë djali i tij, Duka i Cornëall dhe Kembrixhit.

Në këshill marrin pjesë gjithashtu këshilltarët e fshehtë të ftuar dhe ministrat aktualë të qeverisë në detyrë - por këtu mund të përfshihen edhe ish-ministra dhe kryeministra.

Pas takimit, deklarata kryesore, e cila shpall Charles si sovran, do të lexohet në orën 11:00  nga ballkoni me pamje nga Gjykata Friary në Pallatin St James, në qendër të Londrës.


MË SHUME NGA Rajoni dhe Bota