Zbulohen monedhat me portretin e mbretit Charles III
Përgatiti: Jeton Musliu/RTKlive
Pas vdekjes së mbretëreshës Elizabeth II, shumë ndryshime pritet të ndodhin në Britaninë e Madhe. E mes tyre wshtw edhe pamja e monedhave.
Kjo pasi deri më tani, në monedha ka qenë e stampuar portreti i mbretëreshës, kurse tani ato duhet të zëvendësohen me portretin e mbretit.
Një e tillë është zbuluar sot nga BBC, ku në një 50 pence, tashmë është stampuar imazhi i mbretit Charles III.
Këto monedha, pritet të hyjnë në qarkullim pas disa javësh dhe ngadalë do të zëvendësojnë ato me portretin e mbretëreshës që gradualisht do të tërhiqen nga qarkullimi.
BBC publikoi pamje të monedhës 50pence dhe një tjetër të 5 pound(funta), e ku shihet mbreti me imazh të stampuar nga skulptori britanik, Martin Jennings.
Edhe stampimi i monedhave ndjek traditën shekullore pasi tani, fytyra e monarkut është e vendosur majtas e që është në mënyrë të kundërt me paraardhësen e tij, mbretëreshën Elizabeth II, që ishte djathtas.
Ashtu sikurse me mbretërit e mëparshëm britanikë, dhe ndryshe nga mbretëresha, në monedhë, mbreti Charles III, nuk mban kurorë.
Mbreti Charles raportohet se e miratoi personalisht figurën dhe u tha se ishte i kënaqur me ngjashmërinë mes tij dhe portretit.
Monedha 50pence do të jetë e disponueshme për përdorim të përgjithshëm, përpara fundit të vitit.
























