Gjendet trupi i Erdon Ramadanit, i mbytur në lumin ‘Vardar’ |Video
Besnik Iseni/RTK/Shkup
Pas gjashtë ditësh kërkimi,është gjetur në ujërat e lumit ‘Vardar’ trupi i pajetë i studentit Erdon Ramadani nga Kumanova, i cili u aksidentua më 27 shtator në autostradën Tetovë -Shkup, në afërsi të fshatit Zhelinë.
"Në afërsi të objektit ushtarak të Jerebinjës,në lumin ‘Vardar’ ,është gjetur trupi të cilin e kërkonim disa ditë, me Ministrinë e Brendshme e me vullnetarë”, thotë Bekim Maksuti, drejtor i Drejtorisë për Mbrojtje dhe Shpëtim.
Drejtoria për mbrojtje dhe shpëtim, me ushtarë të armatës dhe shumë kompani private, kanë ndihmuar në gjetjen e trupit.
Ekipet e ndërhyrjes dhe vullnetarët e lokalizuan trupin e viktimës, brenda ujërave të lumit ‘Vardar’, në kilometrin e tretë nga vendi i aksidentit.
Pas identifikimit trupi i pajetë i studentit kumanovar, me urdhër të prokurorit është dorëzuar për autopsi në Mjekësinë Ligjore dhe po punohet për zbardhjen e shkaqeve të aksidentit.
Ditën e kobshme, sipas familjarëve, djali i tyre i vetëm Erdani po kthehej nga Tetova, ku kishte shkuar për ta bërë pagesën e semestrit në universitet.























