Covid-19 në Kinë, Bashkimi Evropian i ofron vaksina falas
RTK
Shtretërit e spitaleve u mbushën dhe u krijuan radhë të gjata në spitalet në Shangait. Organizata Botërore e Shëndetësisë i ka kërkuar Kinës t`i publikojë të dhënat e saj për valën e fundit të Covid-19 që po përhapet në gjithë vendin ndërkohë që Bashkimi Evropian ka ofruar vaksina falas.
Bashkimi Evropian i ka ofruar Kinës vaksina falas për COVID-19, tha ekzekutivi i BE-së pasi infeksionet atje u rritën pas relaksimit të politikave vendore "zero-COVID". Kina nuk i është përgjigjur ende ofertës, u tha gazetarëve një zëdhënës i Komisionit Evropian në një konferencë të rregullt. Ai nuk specifikoi sasinë e vaksinave që BE ofronte apo prodhuesit e tyre. Në anën tjetër i pyetur nëse Pekini do ta pranonte ofertën e BE-së, zëdhënësja e ministrisë së Jashtme kineze Mao Ning anashkaloi një përgjigje të drejtpërdrejtë, duke thënë se shkalla e vaksinimit dhe kapaciteti i trajtimit të Kinës vazhduan të rriteshin dhe furnizimet e saj ishin "të përshtatshme". Ajo tha se Kina ishte e hapur për "forcimin e solidaritetit dhe bashkëpunimit me komunitetin ndërkombëtar" për të përballuar më mirë sfidat e saj pandemike, megjithëse mund të "plotësojë kërkesën e kujtdo që dëshiron të vaksinohet". Kina deri më tani ka insistuar të përdorë vetëm vaksina të prodhuara në Kinë, të cilat nuk janë të bazuara në teknologjinë perëndimore mRNA, për popullsinë e saj. Ekspertët e shëndetit të BE-së do të takohen për të diskutuar situatën e COVID në vendet anëtare përpara një mbledhjeje tjetër të mërkurën, kur përfaqësuesit e qeverisë së BE-së do të masin një qasje të koordinuar nga blloku ndaj udhëtarëve nga Kina.























