Guardiola tregon sekretin përse s’është shkarkuar kurrë
RTSH
Në vigjilje të transfertës delikate me Southampton, Josep Guardiola ka gjetur kohë për të dramatizuar situatën pas një pyetje që i bëri një gazetar, i cili ishte kurioz të dinte se si është e mundur që katalanasi nuk është shkarkuar kurrë në klubet ku ka punuar.
“Do të tregoj një sekret, të cilin e mbaj prej shumë kohësh… ne fitojmë ndeshje. Nëse nuk do të fitonim ndeshje, unë do të isha shkarkuar shumë kohë përpara. Nuk qëndroj në këtë post se i kam flokët më të bukura se të tjerëve. Unë nuk jam shkarkuar kurrë pasi kam fituar shumë ndeshje”, tha Guardiola.
Në këtë sezon të Premier League-s kanë qenë plot 12 kolegë të tij, të cilët kanë lënë punën për shkak të ecurisë të dobët të skuadrave respektive. Në komentin e tij Guardiola theksoi se gjërat kanë ndryshuar shumë me kalimin e viteve.
“Mbaj mend se kur isha i ri në Angli menaxherëve u jepej më shumë besim. Pronarët e klubeve dhe drejtorët sportivë tani kanë humbur durimin pasi janë nën trysni dhe në momentin që nuk vijnë rezultatet menjëherë gjejnë shkaktarin tek trajneri”, argumentoi trajneri i City-t.























