Gjeorgji, Parlamenti afër rrëzimit të vetos të ligjit për ‘agjentë të huaj`
BKT
Rajoni dhe Bota

Gjeorgji, Parlamenti afër rrëzimit të vetos të ligjit për ‘agjentë të huaj`

M.Miftari/RTKlive

Një komitet i Parlamentit gjeorgjian hodhi poshtë të hënën, veton e presidentes së Gjeorgjisë ndaj ligjit për "agjentë të huaj", që ka shkaktuar protesta masive për javë të tëra.

Lëvizja e komisionit gjyqësor të Parlamentit krijon mundësinë e një votimi të martën, për të anashkaluar veton e presidentes Salome Zourabichvili, ndaj masës për të cilën ajo dhe kritikët e tjerë thonë, se do të kufizojë lirinë e medies dhe do të pengojë shanset e Gjeorgjisë për t'u bashkuar me Bashkimin Evropian.

Ligji do të kërkonte që mediet dhe organizatat joqeveritare që marrin më shumë se 20% të buxhetit të tyre nga jashtë, të regjistrohen si "përmbushëse të interesave të një fuqie të huaj". Kundërshtarët e denoncojnë atë si "ligji rus", sepse i ngjan masave të ndërmarra nga Kremlini.

Zourabichvili vuri veton ndaj ligjit më 18 maj, pasi ai u miratua në Parlament nga deputetë të partisë qeverisëse ‘Ëndrra Gjeorgjiane’ dhe aleatëve të saj. Ky bllok ka vota të mjaftueshme në Parlament për të anashkaluar veton.

Protestat e mëdha kanë kapluar vazhdimisht kryeqytetin Tbilisi, teksa masa ka kaluar nëpër Parlament.

Të dielën, Zourabichvili dhe kryeministri Irakli Kobakhidze përgënjeshtruan njëri-tjetrin në fjalimet në një ceremoni për shënimin e Ditës së Pavarësisë së Gjeorgjisë.

“Ndërsa fantazma e Rusisë duket mbi ne, partneriteti dhe afrimi me Evropën janë rruga e vërtetë për ruajtjen dhe forcimin e pavarësisë dhe paqes sonë. Ata që sabotojnë dhe minojnë këtë rrugë shkelin dhe dëmtojnë të ardhmen paqësore dhe të sigurt të vendit tonë, duke penguar rrugën drejt anëtarësimit të plotë të botës së lirë dhe demokratike”, tha Zourabichvili, nofton AP, transmeton RTKlive.

Por Kobakhidze kritikoi ashpër Zourabichvilin.

“Ishin uniteti dhe hapat e arsyeshëm të popullit dhe qeverisë së tyre të zgjedhur që na dhanë mundësinë për të ruajtur paqen në vend për dy vitet e fundit, pavarësisht kërcënimeve ekzistenciale dhe tradhtive të shumta, duke përfshirë tradhtinë e presidentit të Gjeorgjisë”, tha ai.

Krahu i politikës së jashtme të Bashkimit Evropian ka thënë se miratimi i ligjit "ndikon negativisht në përparimin e Gjeorgjisë në rrugën drejt BE". Kritikët thonë se mund të jetë nxitur nga Rusia për të penguar shanset e Gjeorgjisë për t'u integruar më tej me Perëndimin.

Sekretari amerikan i Shtetit, Antony Blinken, njoftoi të enjten se sanksionet e udhëtimit do të vendosen ndaj zyrtarëve gjeorgjianë "të cilët janë përgjegjës ose bashkëpunëtorë në minimin e demokracisë në Gjeorgji".

Ai shtoi se “mbetet shpresa jonë që liderët e Gjeorgjisë do të rishqyrtojnë projektligjin dhe do të ndërmarrin hapa për të ecur përpara me aspiratat demokratike dhe euroatlantike të kombit të tyre”.


MË SHUME NGA Rajoni dhe Bota