Administrata e re amerikane për Ukrainën, më e rëndësishmja arritja e paqes
BKT
Rajoni dhe Bota

Administrata e re amerikane për Ukrainën, më e rëndësishmja arritja e paqes

Bardhyl Bajrami /RTK

Arritja e Paqes në Ukrainë është më e rëndësishme sesa nxitja e Ukrainës t’i rikthejë territoret e okupuara nga Rusia ka thënë një këshilltar i lartë i presidentit amerikan në ardhje Donald Trump. Ky këshilltar ka përmendur vetëm Krimenë, por jo edhe pjesët e okupuara në lindje të Ukrainës.

Një këshilltar i lartë i presidentit në ardhje të SHBA-së, Donald Trump ka thënë se administrata e re do të përqendrohet në arritjen e paqes në Ukrainë në vend se t’i mundësojë vendit, Ukrainës, rikthimin e territoreve të okupuara nga Rusia.

Bryan Lanza, një strateg në partinë republikane ka thënë për BBC se administrata e Trumpit do të kërkon nga presidenti ukrainas Volodymyr Zelenski versionin e tij “realist për paqen”.

Nëse presidenti Zelenski ulet në tavolinë dhe thotë se ne mund të kemi paqe nëse e kthejmë Krimenë, ai na tregon neve se nuk është serioz, ka thënë Lanza. Këshilltari i presidentit Trump nuk i ka përmendur zonat në lindje të Ukrainës.

Bryan Lanza është këshilltar politik i presidentit Trump që nga fushata e vitit 2016. Kujtojmë se Rusia e aneksoi Gadishullin e Krimesë në vitin 2014 ndërsa 8 vjet më vonë nisi luftën e plotë për pushtimin e Ukrainës dhe ka pushtuar pjesë në lindje të Ukrainës.

Trump pritet që sapo të marrë detyrën në janar të 2025-s do të nis bisedimet për paqe me rrethin e ngushtë të këshilltarëve të tij.

Sipas Institutit Kiel për Ekonominë e Botës,organizatë kjo gjermane, që nga shkurti 2022 deri në fund të qershorit 2024, SHBA ka furnizuar me armë Ukrainën me vlerë prej 55.5 miliardë dollarëve.


MË SHUME NGA Rajoni dhe Bota