Pasojat e tërmetit në Mianmar, arrin në 1700 numri i të vdekurve
BKT
Rajoni dhe Bota

Pasojat e tërmetit në Mianmar, arrin në 1700 numri i të vdekurve

Dardan Ramabaja /RTK

Disa të mbijetuar janë nxjerrë nga rrënojat e ndërtesave që u shemben nga tërmeti në Mianmar, ku numri i të vdekurve ka arritur në 1700.

Katër persona të tjerë janë nxjerrë nga rrënojat gati 60 orë pasi tërmeti i fuqishëm me magnitudë 7.7 goditi Mianmarin të premten.

Të mbijetuarit u shpëtuan nga një ndërtesë shkolle e shembur në rajonin verior të Sagaing, nga e cila u gjet edhe një trup, tha shërbimi zjarrfikës i Mianmarit.

Qindra njerëz mbeten të zhdukur, me përpjekjet e dëshpëruara të kërkimit dhe shpëtimit që vazhdojnë të hënën si në Mianmar ashtu edhe në Tajlandën fqinje.

Numri i të vdekurve është rritur në 18 persona në kryeqytetin e Tajlandës, Bangkok, ku 76 punëtorë janë ende mbeten të zhdukur pas shembjes së një ndërtese shumëkatëshe që ishte në ndërtim e sipër.

Tërmeti i së premtes ndodhi pranë qytetit të dytë më të madh të Mianmarit, Mandalay me lëkundje që prekën edhe vende të tjera.

Megjithëse përpjekjet e shpëtimit kanë nisur që nga e premtja dhe ndihma ndërkombëtare ka filluar të arrijë në Mianamar, ka pasur vonesa në arritjen e zonave më të goditura, duke i lënë vendasit të përpiqen të nxjerrin të mbijetuarit me dorë.

Organizata Botërore e Shëndetësisë (OBSH) ka paralajmëruar se spitalet janë të mbingarkuar me njerëz të lënduar, ndërsa një zëdhënës i Programit Botëror të Ushqimit i ka deklaruar se mijëra njerëz të zhvendosur janë pa ushqim, strehim dhe ilaçe.

Të shtunën mbrëma, një grua e moshuar u shpëtua në kryeqytetin e Mianmarit, Nay Pyi Taw, pasi u bllokua për 36 orë nën rrënojat e një spitali.

Njëzet e nëntë persona u shpëtuan gjithashtu nga një bllok apartamentesh i shembur në Mandalay, tha të dielën autoriteti lokal i zjarrfikësve.

Tërmeti goditi rreth orës 12:50 sipas kohës lokale të premten, vetëm 10 km nga sipërfaqja - që do të thotë se efektet e tij në nivelin e tokës u ndjenë më fortë.

Një tërmet i dytë goditi 12 minuta më vonë, me një magnitudë 6.4 ballë dhe një epiqendër 18 km në jug të Sagaing, kryeqyteti rajonal, i cili ndodhet afër Mandalay.

Pasgoditjet kanë vazhduar që nga ajo kohë. Të dielën një tërmet me magnitudë 5.1 u regjistrua në veri-perëndim të Mandalay.


MË SHUME NGA Rajoni dhe Bota