Trump dhe Musk vendosin të mbyllin MCC-në
BKT
Rajoni dhe Bota

Trump dhe Musk vendosin të mbyllin MCC-në

RTKlive

Administrata e presidentit amerikan Donald Trump, në bashkëpunim me këshilltarin e tij miliarder Elon Musk, ka vendosur të mbyllë agjencinë e ndihmës Millennium Challenge Corporation (MCC), një institucion i krijuar nga ish-presidenti George W. Bush në vitin 2004 me qëllim uljen e varfërisë dhe nxitjen e zhvillimit ekonomik në vendet në zhvillim.

Lajmi është bërë i ditur nga agjencia e lajmeve Reuters, e cila ka siguruar një regjistrim të një takimi të mbajtur me stafin e MCC-së, si dhe një email zyrtar që konfirmon vendimin. Sipas zyrtares së lartë të MCC-së, Kyeh Kim, “ndihma e jashtme nuk është më prioritet për administratën aktuale dhe për këtë arsye puna e MCC-së duhet të mbyllet.”

MCC kishte një buxhet vjetor prej afro 900 milionë dollarësh dhe bashkëpunonte me vende të ndryshme për projekte që përfshinin përmirësimin e infrastrukturës dhe furnizimit me energji elektrike. Mbyllja e kësaj agjencie vjen pasi më herët administrata Trump ka shpërbërë edhe USAID-in, agjencinë kryesore amerikane të ndihmës ndërkombëtare, e cila menaxhonte rreth 40 miliardë dollarë ndihma në vit.

Vendimi është pjesë e një fushate më të gjerë të quajtur “Departamenti për Efikasitetin e Qeverisë” (DOGE), një nismë e re e udhëhequr nga Elon Musk, e cila synon të shkurtojë masivisht shpenzimet federale dhe strukturat ekzistuese të qeverisë.

Deri më tani, MCC nuk ka dhënë ndonjë reagim zyrtar mbi këtë zhvillim. Mbyllja e saj ngre pikëpyetje serioze mbi të ardhmen e ndihmës së jashtme amerikane dhe ndikimin që kjo do të ketë në partneritetet ndërkombëtare, përfshirë edhe ato në Ballkan.


MË SHUME NGA Rajoni dhe Bota