Trump thotë se e ka inkurajuar Netanyahun të `vazhdojë` fushatën në Iran
RTKlive
Presidenti amerikan Donald Trump i ka thënë kryeministrit izraelit Benjamin Netanyahu që të vazhdojë fushatën e tij kundër Iranit.
“Unë i thashë: Vazhdo,” ka deklaruar Trump gjatë një interviste për CNN, duke theksuar se komunikon me Netanyahun çdo ditë. “Ai është një njeri i mirë, po bën shumë.”
Sipas CNN, biseda e fundit mes tyre ka qenë dje, ndërsa Trump po shqyrton mundësinë e mbështetjes së Izraelit në përpjekjet kundër Iranit.
Presidenti amerikan gjithashtu tha se beson se Netanyahu është trajtuar padrejtësisht në vendin e tij, duke iu referuar sfidave ligjore me të cilat përballet në Izrael.
Duke iu përgjigjur pyetjes nëse ka ofruar ndihmë shtesë për Izraelin, Trump tha: “Jo. Deri tani, ai ka bërë një punë të mirë. Është trajtuar shumë padrejtësisht. Ai është një president lufte dhe po kalon nëpër këtë marrëzi, që është qesharake.”























