Trump rrit tarifat ndaj Kanadasë pas reklamës së Ontarios me Ronald Reagan
BKT
Foto: Getty Images
Rajoni dhe Bota

Trump rrit tarifat ndaj Kanadasë pas reklamës së Ontarios me Ronald Reagan

RTKlive

Presidenti i SHBA-së, Donald Trump, ka thënë se po rrit tarifat ndaj mallrave të importuara nga Kanadaja, pasi provinca e Ontarios ka transmetuar një reklamë kundër tarifave, ku shfaqej ish-presidenti Ronald Reagan.

Në një postim në rrjetet sociale të shtunën, Trump e quajti reklamën “mashtrim” dhe kritikoi zyrtarët kanadezë që nuk e hoqën atë përpara kampionatit të bejzbollit World Series.

“Për shkak të shtrembërimit serioz të fakteve dhe aktit armiqësor, po rris tarifën ndaj Kanadasë me 10% mbi atë që ata po paguajnë aktualisht,” shkroi ai.

Pas tërheqjes së Trump-it të enjten nga bisedimet tregtare me Kanadanë, kryeministri i Ontarios tha se do ta tërhiqte reklamën, raporton BBC.

Kanadaja është i vetmi vend i G7 që nuk ka arritur ende një marrëveshje me SHBA-në që kur Trump filloi të kërkonte tarifa të larta për mallrat nga partnerët kryesorë tregtarë.

SHBA tashmë ka vendosur një taksë prej 35% për të gjitha mallrat kanadeze – megjithëse shumica janë të përjashtuara në bazë të një marrëveshjeje ekzistuese të tregtisë së lirë. Ajo ka vendosur gjithashtu tarifa të veçanta për sektorë të caktuar të mallrave kanadeze, përfshirë një taksë 50% për metalet dhe 25% për makinat.

Tre të katërtat e eksporteve kanadeze shiten në SHBA, dhe Ontario është qendra kryesore e prodhimit të automjeteve në Kanada.

Kryeministri i Ontarios, Doug Ford, tha të premten se do të ndalonte përkohësisht fushatën publicitare kundër tarifave në SHBA.

Ai u tha gazetarëve se mori vendimin pas bisedimeve me kryeministrin Mark Carney të premten, duke shtuar se spoti televiziv do të ndalet të hënën “në mënyrë që të rifillojnë bisedimet tregtare”. Ai gjithashtu tha se reklama do të vazhdojë të transmetohet gjatë fundjavës, përfshirë edhe gjatë ndeshjeve të World Series, ku përballen Toronto Blue Jays dhe Los Angeles Dodgers.


MË SHUME NGA Rajoni dhe Bota