Mbreti i Jordanisë: Asnjë vend nuk do të dëshirojë të imponojë paqe në Gazë
A.B|RTKLive
Vendet do të refuzonin të dërgoheshin për të “zbatuar” paqen në Gaza nëse vendoset një plan armëpushimi sipas propozimit të Donald Trump, ka thënë Mbreti Abdullah i Jordanisë për BBC-në.
Sipas planit 20-pikësh të paqes të Presidentit amerikan Trump, shtetet arabe dhe partnerët ndërkombëtarë do të angazhojnë forca stabilizimi që “do të trajnojnë dhe mbështesin forcat policore palestineze të verifikuara në Gaza, dhe do të konsultohen me Jordaninë dhe Egjiptin, të cilat kanë përvojë të gjerë në këtë fushë.” Hamas do të duhet të çarmatoset dhe të heqë dorë nga kontrolli politik mbi territorin.
“Cili është mandati i forcave të sigurisë brenda Gazës? Dhe ne shpresojmë që të jetë paqeruajtje, sepse nëse është zbatim paqeje, askush nuk do të dojë të përfshihet,” tha Mbreti Abdullah.
Në një intervistë ekskluzive për BBC, ai tha se Jordania dhe Egjipti janë të gatshëm të trajnojnë forcat e sigurisë palestineze.
“Paqeruajtja nënkupton që je aty për të mbështetur forcat lokale të policisë, palestinezët, të cilët Jordania dhe Egjipti janë të gatshëm t’i trajnojnë në numër të madh, por kjo kërkon kohë. Nëse jemi duke patrulluar në Gaza me armë, kjo nuk është një situatë në të cilën ndonjë vend do të dëshironte të përfshihej,” tha ai.
Komentet e Mbretit pasqyrojnë shqetësimin e SHBA-së dhe vendeve të tjera për mundësinë e përfshirjes në një konflikt të vazhdueshëm mes Hamasit dhe Izraelit, apo mes Hamasit dhe grupeve të tjera palestineze.























