Prodhimi i opiumit në Afganistan bie ndjeshëm pas ndalimit të talibanëve
BKT
Rajoni dhe Bota

Prodhimi i opiumit në Afganistan bie ndjeshëm pas ndalimit të talibanëve

A.B|RTKlive

Prodhimi i opiumit në Afganistan bie ndjeshëm pas ndalimit të talibanëve, sipas një raporti të OKB-së.

Kultivimi i opiumit në Afganistan është ulur ndjeshëm pas ndalimit të vendosur nga qeveria talebane në vitin 2022, tha Organizata e Kombeve të Bashkuara, raporton BBC.

Sipas një studimi të Zyrës së OKB-së për Drogën dhe Krimin (UNODC), sipërfaqja totale e tokës së përdorur për kultivimin e lulëkuqes së opiumit është zvogëluar me 20% krahasuar me një vit më parë, ndërsa sasia e opiumit të prodhuar ka rënë me 32% gjatë të njëjtës periudhë.

Afganistani më parë prodhonte mbi 80% të opiumit në botë, dhe heroina e bërë nga opiumi afgan përbënte 95% të tregut në Evropë.

Por pasi morën sërish pushtetin, talebanët ndaluan kultivimin e opiumit në prill të vitit 2022, duke thënë se ai ishte i dëmshëm dhe në kundërshtim me besimet e tyre fetare. OKB-ja tha se shumica e fermerëve kanë vazhduar të respektojnë ndalimin, pavarësisht “sfidave të rënda ekonomike”.

Shumë fermerë afganë po korrin drithëra, por lulëkuqja – nga e cila nxirret opiumi, përbërësi kryesor për prodhimin e heroinës – vazhdon të jetë “shumë më fitimprurëse” sesa të mbjellat legjitime, theksoi UNODC (Zyra e OKB-së për Drogën dhe Krimin).

Sipas raportit, mbi 40% e tokës së disponueshme bujqësore ka mbetur e papunuar për shkak të mungesës së alternativave fitimprurëse, prodhimit të ulët bujqësor dhe kushteve të pafavorshme klimatike.

Sipërfaqja totale e kultivuar me lulëkuqe të opiumit këtë vit është vlerësuar në rreth 10,200 hektarë, kryesisht në verilindje të vendit, me provincën Badakhshan që mban pjesën më të madhe. Para ndalimit të vitit 2022, më shumë se 200,000 hektarë tokë në Afganistan ishin të mbjella me lulëkuqe opiumi.

Katër provinca ku më parë kultivohej lulëkuqe opiumi në vitin 2024 (Balkh, Farah, Laghman dhe Uruzgan) janë shpallur të lira nga kultivimi i kësaj bime në vitin 2025.

“Eliminimi pothuajse i plotë i kultivimit në zonat tradicionale tregon shkallën dhe qëndrueshmërinë e ndalimit të kultivimit të lulëkuqes së opiumit,” thuhet në raport.

Përpjekjet e talebanëve për të shkatërruar fushat e opiumit herë pas here kanë shkaktuar rezistencë të dhunshme nga fermerët, veçanërisht në verilindje, tha UNODC, duke vënë në dukje se janë raportuar viktima gjatë përleshjeve në disa distrikte të Badakhshan-it.

Megjithatë, shumica dërrmuese e fermerëve afganë i përmbahen ndalimit të shpallur nga udhëheqësi suprem i talebanëve.

Sidoqoftë, fermerët thonë se nuk kanë mbështetje për të kultivuar të mbjella alternative – dhe për këtë arsye, janë të detyruar të zgjedhin midis varfërisë ose ndëshkimit.

“Nëse shkelim ndalimin, përfundojmë në burg. Nëse e zbatojmë, mbetemi të mjeruar,” tha një fermer anonim nga provinca Helmand për BBC Pashto këtë verë.


MË SHUME NGA Rajoni dhe Bota