Pogba rikthehet në fushë pas 26 muajsh mungesë
BKT
Sport

Pogba rikthehet në fushë pas 26 muajsh mungesë

F.B/RTKLive

Mesfushori francez, Paul Pogba, është rikthyer më në fund në fushë pas një periudhe të gjatë prej 26 muajsh, të mbushur me dëmtime dhe një ndalim për doping.

Rikthimi i tij u prit me duartrokitje të zjarrta nga tifozët e pranishëm në “Roazhon Park”, në minutën e 85-të të ndeshjes së Ligue 1 mes Rennes dhe Monacos.

Edhe pse rikthimi i Pogbas nuk u shoqërua me rezultat pozitiv – Monacos humbi 4-1 – paraqitja e tij e shkurtër ngjalli entuziazëm te publiku. Pasimet e para të francezit, përfshirë një top të gjatë dhe një goditje elegante me thembër, u pritën me ovacione nga tifozët.

Në përfundim të ndeshjes, Pogba u gjunjëzua për disa momente në fushë, i emocionuar nga rikthimi pas një periudhe të vështirë.

Ai u përshëndet sërish nga tifozët gjatë një xhiroje të shkurtër nderimi.

Ndeshja e fundit e Pogbas ishte luajtur më 3 shtator 2023, në sfidën Empoli–Juventus, duke e bërë kthimin e tij në fushë një moment të shumëpritur në karrierën e tij.