Lituania shpall gjendje emergjence, shkak hyrja e balonave nga Bjellorusia
BKT
Rajoni dhe Bota

Lituania shpall gjendje emergjence, shkak hyrja e balonave nga Bjellorusia

M.M./ RTKlive

Shteti baltik, Lituania, thotë se balonat e ngarkuara me cigare që vijnë nga Bjellorusia, e cila është aleate e Moskës, përbëjnë një formë sulmi hibrid dhe kërcënim për sigurinë kombëtare.

Qeveria e Lituanisë shpalli të martën gjendjen e emergjencës për shkak të rreziqeve të sigurisë që paraqesin balonat kontrabanduese nga Bjellorusia, të cilat kanë shkelur hapësirën e saj ajrore në javët e fundit, raporton euronews.

Tensionet mes Vilniusit dhe Minskut janë rritur pasi balonat meteorologjike që vinin nga Bjellorusia detyruan Lituaninë fqinje të mbyllë në mënyrë të përsëritur aeroportin e saj kryesor javët e fundit, duke lënë mijëra njerëz të bllokuar.

Ndërsa balonat përdoren për të kontrabanduar cigare në Lituani, zyrtarët e shtetit baltik thonë se ato janë akte të qëllimshme destabilizimi, të orkestruara nga Bjellorusia aleate e Rusisë.

Duke shpallur gjendjen e emergjencës, qeveria lituaneze përmendi “interesat e sigurisë kombëtare” dhe kërcënimin ndaj jetës njerëzore, pronës dhe mjedisit nga balonat.

Vendimi erdhi pas një mbledhjeje të kabinetit të vendit anëtar të BE-së dhe NATO-s, një mbështetës i fortë i Ukrainës në luftën kundër pushtimit të plotë rus, tashmë në vitin e katërt.

“Gjendja e emergjencës u shpall për shkak të ndërprerjeve në aviacionin civil dhe për shkak të shqetësimeve të sigurisë kombëtare,” tha ministri i Brendshëm, Vladislavas Kondratovičius gjatë mbledhjes.

Kondratovičius tha se qeveria i ka kërkuar parlamentit të lejojë ushtrinë të punojë së bashku me policinë, rojen kufitare dhe zyrtarët e sigurisë gjatë gjendjes së emergjencës. Nuk ishte menjëherë e qartë sa do të zgjaste kjo gjendje.

Muajin e kaluar, kryeministrja Inga Rugienenė tha se incidentet me balona përbënin një formë sulmi hibrid dhe paralajmëroi se kërcënimi po rritej pas hyrjeve të ngjashme edhe në Letoni.

Lituania e mbylli kufirin me Bjellorusinë për disa javë në fund të tetorit për shkak të kërcënimit nga balonat.

Lituania i sheh balonat kontrabanduese si pjesë të një sulmi hibrid kundër vendit. Minsku më herët ka shërbyer si terren për luftë hibride, i akuzuar për shtyrjen e mijëra azilkërkuesve drejt kufijve polakë dhe lituanezë.

Minsku ka mohuar përgjegjësinë për balonat. Në fillim të nëntorit, presidenti bjellorus Aliaksandr Lukashenko e quajti mbylljen e kufirit nga Lituania një “mashtrim të çmendur”.

Evropa është në gjendje alarmi pasi ndërhyrjet e dronëve në hapësirën ajrore të NATO-s arritën një shkallë të paprecedentë në shtator.

Presidentja e Komisionit Evropian, Ursula von der Leyen, javën e kaluar e përshkroi kalimin e balonave si një “sulm hibrid” nga Bjellorusia që ishte “plotësisht i papranueshëm”. Ajo tha se BE po përgatit masa të mëtejshme kundër Minskut në kuadër të regjimit të saj të sanksioneve.


MË SHUME NGA Rajoni dhe Bota