Ambasadori i SHBA-së: Europa aleate natyrale por me identitet të fortë
M.M./ RTKlive
Andrew Puzder, i dërguari i Uashingtonit në BE, tha se Shtetet e Bashkuara e shohin Evropën si një aleate natyrale, por ajo duhet të ruajë identitetin e saj thelbësor që marrëdhënia të funksionojë. Sipas tij, Shtetet e Bashkuara të Amerikës duan të ndihmojnë Evropën të ruajë identitetin.
Duke folur në emisionin kryesor të mëngjesit të Euronews, ambasadori amerikan në Bashkimin Evropian, Andrew Puzder, mbrojti një dokument të diskutueshëm të sigurisë kombëtare, në të cilin administrata Trump i bën thirrje BE-së të ndryshojë kurs apo të përballet me rrezikun e një rënieje civilizimi. Në Evropë, dokumenti është pritur me habi dhe kritika.
Ambasadori Puzder mbrojti pozicionin e SHBA-së, duke thënë se dokumenti synon të rikthejë “madhështinë” e Evropës dhe nuk duhet parë si sulm, por si një sërë rekomandimesh për forcimin e saj.
“Pjesa për Evropën titullohet ‘Një propozim për Madhështinë e Evropës’, nuk quhet ‘nuk e duam Evropën’ apo ‘duam që Evropa të zhduket’”, tha ai për Euronews.
“Nëse e lexoni më tej, dokumenti thotë se Evropa është strategjikisht dhe kulturalisht vitale për Shtetet e Bashkuara. Evropa është një shtyllë e ekonomisë globale dhe e prosperitetit amerikan,” shtoi ai.
Javën e kaluar, SHBA-të përditësuan rishikimin e tyre të sigurisë kombëtare, në të cilin sugjerohej se Evropa rrezikon rënie civilizimi si rezultat i rregullimit të tepërt, migracionit ilegal dhe politikave të dobëta ekonomike.
Qëllimi i Uashingtonit, thuhej në dokument, është që “ta ndihmojë Evropën të kthejë kursin aktual”, gjë që përfshin kultivimin e marrëdhënieve me “partitë patriotike evropiane” që kundërshtojnë nga brenda. Gjuha dhe toni i dokumentit kanë trazuar evropianët.
Një diplomat që foli për Euronews tha se dokumenti kishte shumë pak lidhje me sigurinë kombëtare, pasi mezi përmendte Rusinë, të cilën evropianët e konsiderojnë kërcënim, dhe kishte më shumë të bënte me ndërhyrjen politike.
Nga kancelari gjerman, Friedrich Merz, presidenti i Këshillit Evropian, Antonio Costa, dhe shefja e Politikës së Jashtme, Kaja Kallas, kundërshtuan duke thënë se demokracia nuk ka nevojë për shpëtim të jashtëm dhe çështjet e brendshme janë për BE-në.
Megjithatë, ambasadori Puzder tha se evropianët po e keqinterpretojnë qëllimin e administratës amerikane dhe duhet ta shohin dokumentin nga një perspektivë tjetër. “Nuk është aq i keq sa duket, vërtet nuk është,” tha ai.
Ai gjithashtu mohoi se Administrata Trump po kërkon mënyra për të dobësuar, apo edhe shpërbërë, Bashkimin Evropian nga brenda.
Kjo teori u amplifikua gjatë fundjavës kur miliarderi i teknologjisë Elon Musk, i cili ka mbështetur Presidentin Trump dhe për pak kohë drejtoi departamentin DOGE, argumentoi se blloku nuk është një demokraci e vërtetë dhe duhet të shpërbëhet.
Ambasadori Puzder tha se nuk ekziston një plan i tillë, por theksoi se SHBA do që Evropa të ruajë sovranitetin dhe vlerat kombëtare, pasi ato janë shtylla e marrëdhënieve transatlantike.























