Lideri suprem i Iranit fajëson SHBA-në për protestat vdekjeprurëse
BKT
Rajoni dhe Bota

Lideri suprem i Iranit fajëson SHBA-në për protestat vdekjeprurëse

Flutura Bekqeli / RTK

Udhëheqësi suprem i Iranit, Ajatollah Ali Khamenei, ka akuzuar SHBA-në dhe Donald Trumpin si përgjegjës për "viktima, dëme dhe shpifje" në vendin e tij gjatë protestave të fundit.

Në një fjalim të shtunën, Khamenei pranoi se mijëra njerëz ishin vrarë gjatë trazirave të fundit, "disa në një mënyrë çnjerëzore dhe të egër", por fajësoi për vdekjet "rebeluesit". Presidenti amerikan u ka kërkuar demonstruesve antiqeveritarë iranianë të "vazhdojnë të protestojnë" dhe kërcënoi me ndërhyrje ushtarake nëse forcat e sigurisë i vrasin.

Protestat në Iran kanë marrë 3,090 jetë, sipas Agjencisë së Lajmeve të Aktivistëve të të Drejtave të Njeriut Iranianë me seli në SHBA, në trazirat që filluan për shkak të ekonomisë më 28 dhjetor.

Që atëherë, protestat janë shndërruar në thirrje për fundin e sundimit të udhëheqësit suprem të Iranit. Qeveria iraniane i ka quajtur demonstratat "trazira" të mbështetura nga armiqtë e Iranit.

Protestuesit janë përballur me forcë vdekjeprurëse dhe ka pasur një mbyllje pothuajse totale të internetit dhe shërbimeve të komunikimit.

Ka pasur më pak raportime për trazira në ditët e fundit, por me aksesin në internet ende të kufizuar, zhvillimet në terren mbeten të paqarta.

Gjatë fjalimit të tij të shtunën, Khamenei tha gjithashtu se Irani e konsideronte Presidentin Trump si një "kriminel" dhe tha se SHBA-të duhet të "mbahen përgjegjëse" për trazirat e fundit.

Ai gjithashtu pretendoi në mediat sociale se "qëllimi i Amerikës është të gëlltisë Iranin". Trump ende nuk i është përgjigjur udhëheqësit suprem te Iranit. Donald Trump tha të mërkurën se i ishte thënë se "vrasjet në Iran kanë ndaluar", por shtoi se nuk e kishte përjashtuar veprimin ushtarak kundër vendit.

Komentet e tij erdhën pasi SHBA-të dhe Mbretëria e Bashkuar ulën numrin e personelit në bazën ajrore Al-Udeid në Katar.


MË SHUME NGA Rajoni dhe Bota