Liverpool kalon në çerekfinale me fitore të thellë ndaj Galatasaray
Uran Krasniqi / RTKLive
(E plotësuar, 22:57) - Liverpool ka siguruar kualifikimin në çerekfinale të Champions League, pas një fitore të thellë 4-0 ndaj Galatasaray në ndeshjen e kthimit të zhvilluar të mërkurën mbrëma.
Skuadra angleze e ka përmbysur humbjen 1-0 nga ndeshja e parë dhe ka kaluar tutje me rezultat të përgjithshëm.
Liverpool e ka nisur ndeshjen me ritëm të lartë dhe ka kaluar në epërsi në minutën e njëzet e pestë me golin e Dominik Szoboszlai, i cili ka realizuar me një goditje të fortë nga distanca pas asistimit nga Alexis Mac Allister.
Në fund të pjesës së parë, vendasit kanë pasur mundësi të artë për ta dyfishuar epërsinë, por Mohamed Salah e ka humbur një penallti në minutën e katërt të kohës shtesë, pasi portieri Ugurcan Çakır ka bërë një pritje të sigurt.
Megjithatë, në pjesën e dytë Liverpool është shfaqur shumë më dominues dhe e ka mbyllur shpejt ndeshjen. Në minutën e pesëdhjetë e një, Salah ka asistuar për Hugo Ekitike, i cili ka shënuar për 2-0.
Vetëm dy minuta më vonë, Ryan Gravenberch ka shënuar për 3-0 pas një topi të kthyer në zonë, duke e thelluar avantazhin e skuadrës angleze.
Rezultati përfundimtar u vulos në minutën e pesëdhjetë e gjashtë, kur mbrojtësi Wilfried Singo ka realizuar autogol, duke dërguar topin në rrjetën e portës së tij për 4-0.
Ndeshja është transmetuar drejtpërdrejt nga RTK me komentim nga Arben Berisha. 
Liverpool në epërsi ndaj Galatasaray
Liverpool ka kaluar në epërsi 1-0 ndaj Galatasaray në ndeshjen e kthimit të 1/8 së finales në Champions League.
Skuadra angleze e ka nisur takimin me intensitet të lartë dhe ka arritur ta zhbllokojë rezultatin në minutën e njëzet e pestë përmes Dominik Szoboszlai.
Goli ka ardhur pas një goditje nga këndi, të ekzekutuar nga Alexis Mac Allister. Topi ka përfunduar te Szoboszlai, i cili me një goditje të fortë nga distanca e ka mposhtur portierin.
Ky gol ka barazuar rezultatin e përgjithshëm në 1-1, pasi ndeshjen e parë e kishte fituar Galatasaray me rezultat minimal 1-0.
Në fund të pjesës së parë, Liverpool e ka pasur mundësinë e artë për ta dyfishuar epërsinë. Në minutën katërt të kohës shtesë, Mohamed Salah e ka humbur një penallti, pasi goditja e tij e ulët në qendër është ndalur lehtësisht nga portieri Ugurcan Çakır, i cili ka qëndruar në vend dhe e ka bërë pritjen vendimtare.
Ndeshja po transmetohet drejtpërdrejt në RTK, me komentim nga Arben Berisha.























