Von der Leyen dhe liderët evropianë në Kiev mbështesin Ukrainën
Bardhyl Bajrami / RTK
Sulmet ruse ndaj qyteteve ukrainase vazhdojnë të shkaktojnë viktima dhe dëme të mëdha në infrastrukturën civile, ndërsa në Kiev po zhvillohen takime të rëndësishme me liderët evropianë për mbështetjen e Ukrainës, integrimin evropian dhe forcimin e bashkëpunimit në fushën e mbrojtjes.
Të paktën gjashtë sulme ajrore ruse goditën të mërkurën qytetin e Sumyt, duke lënë të vrarë tre persona dhe duke plagosur të paktën 17 të tjerë. Mes të plagosurve është edhe një djalë 16-vjeçar, i cili së bashku me dy persona të tjerë ndodhet në gjendje të rëndë dhe po i nënshtrohet ndërhyrjes kirurgjikale.
Sipas autoriteteve rajonale, njëra prej bombave goditi pranë objekteve mjekësore në një zonë me qarkullim të madh këmbësorësh dhe automjetesh, ndërsa sulmet e tjera kishin në shënjestër infrastrukturën e qytetit.
Shërbimet e emergjencës raportuan se disa automjete u përfshinë nga flakët, ndërsa operacionet e shpëtimit u vështirësuan nga rreziku i sulmeve të reja.
Sulme të tjera ruse u regjistruan edhe në rajonin e Donetskut, ku u plagosën tre persona dhe u dëmtuan 21 objekte civile, përfshirë dhjetë ndërtesa banimi. Qytetet Kramatorsk, Sloviansk, Druzhkivka dhe Mykolaivka u goditën me artileri, dronë dhe bomba të drejtuara.
Në Odesa, një sulm raketor rus shkaktoi zjarr në një objekt industrial dhe dëmtoi ndërtesa civile dhe automjete. Në një tjetër sulm në qytet, tre persona humbën jetën dhe të paktën tre të tjerë u plagosën pas goditjes së një ndërtese shumëkatëshe banimi. Mes të shpëtuarve ishin edhe dy fëmijë.
Në të njëjtën kohë, presidentja e Komisionit Evropian, Ursula von der Leyen, mbërriti në Kiev në Ditën e Shtetësisë së Ukrainës, së bashku me disa liderë evropianë. Ajo njoftoi iniciativa të reja për integrimin e industrive të mbrojtjes të Ukrainës dhe Bashkimit Evropian, si dhe diskutime për anëtarësimin e Ukrainës në BE dhe përgatitjet për dimrin e ardhshëm.
Në samitin rajonal në Kiev marrin pjesë edhe delegacione nga Moldavia, Sllovenia, Maqedonia e Veriut dhe Bullgaria, ndërsa i pranishëm është edhe presidenti serb Aleksandar Vuçiq.























