Pochettino vazhdon me SHBA-në deri në Botërorin 2030
Uran Krasniqi / RTKLive
Përzgjedhësi i kombëtares së Shteteve të Bashkuara të Amerikës, Mauricio Pochettino, ka zgjatur kontratën dhe do ta udhëheqë ekipin deri në Kampionatin Botëror të vitit 2030.
Federata Amerikane e Futbollit ka njoftuar të hënën se trajneri argjentinas pesëdhjetë e katër vjeçar do ta vazhdojë projektin që ka nisur në vitin 2024, pasi këtë verë e kishte dërguar SHBA-në deri në fazën e 1/16 së finales së Botërorit.
Nën drejtimin e Pochettinos, SHBA-ja e kishte mbyllur në vendin e parë grupin ku bënin pjesë Australia, Paraguai dhe Turqia. Gjashtë pikët e grumbulluara ishin numri më i madh i pikëve që kombëtarja amerikane ka fituar ndonjëherë në fazën e grupeve të një Botërori.
Më pas amerikanët kishin eliminuar Bosnjë e Hercegovinën në fazën e 1/32 së finales, por janë ndalur në raundin tjetër pas humbjes 4:1 nga Belgjika.
"Ka potencial të jashtëzakonshëm për ta bërë edhe më të fortë kombëtaren e SHBA-së. Mbështetja që morëm nga tifozët gjatë Botërorit na bindi edhe më shumë për atë që mund të arrijmë", ka deklaruar Pochettino.
Drejtori ekzekutiv i Federatës Amerikane, JT Batson, ka thënë se vazhdimi i bashkëpunimit do t'i japë mundësi ekipit të ndërtojë mbi progresin e arritur dhe të përgatitet për sfidat e ardhshme.
Pochettino më parë ka drejtuar Southampton, Tottenham Hotspur, Paris Saint-Germainin dhe Chelsea.























