BE-ja diskuton mbështetje shtesë financiare për Ceutën pas fluksit të migrantëve
G.K/RTKlive
Komisioni Evropian po diskuton me zyrtarët spanjollë mbështetje shtesë financiare për Ceutën, pas fluksit të paprecedentë të migrantëve nga Maroku, raporton Euronews.
Zëdhënësi i Komisionit Evropian, Guillaume Mercier, ka konfirmuar se diskutimet ndërmjet Spanjës dhe Brukselit po zhvillohen me “intensitet të plotë”, pasi 72 mijë persona hynë javën e kaluar në enklavën spanjolle.
Sipas tij, Komisioni e ka pranuar vlerësimin e parë të nevojave nga Spanja dhe po e shqyrton atë, ndërsa hapi i ardhshëm është dorëzimi i kërkesës zyrtare.
Financimi mund të përdoret për pajisje dhe shërbime të menaxhimit të kufirit, strehimore të përkohshme, ushqim, ndihmë mjekësore, personel emergjent dhe mbështetje tjetër humanitare.
Kërkesa ende nuk është përfunduar dhe nuk është përcaktuar shuma që do të kërkohet.
Zyrtarët spanjollë kanë bërë të ditur se 70 mijë persona janë kthyer në Marok, ndërsa deri në pesë mijë, përfshirë 860 të mitur të pashoqëruar, kanë mbetur në Ceutë. Gjatë ngjarjeve të javës së kaluar kanë humbur jetën të paktën 88 persona.
Komisionari evropian për Çështje të Brendshme dhe Migracion, Magnus Brunner, ka thënë se Spanja ka marrë 114 milionë euro ndihmë emergjente, përfshirë rreth 28 milionë euro për sistemet e pritjes, azilit dhe kthimit në Ceutë. / Burimi: Euro News























