PSG me Barcelonën dhe Manchester cityn, përballje të forta për Arsenalin
BKT
Sport

PSG me Barcelonën dhe Manchester cityn, përballje të forta për Arsenalin

Uran Krasniqi / RTKLive

Kampioni në fuqi i Champions League, Paris Saint-Germain, do ta ketë një program të vështirë në tetë ndeshjet e fazës së ligës: do të përballet me Barcelonën, Manchester Cityn, Romën, Aston Villën, Galatasarayn, Villarrealin, Slovan Bratislavën dhe Comon.

Është hedhur të enjten shorti i fazës së ligës për sezonin e ri, duke sjellë disa përballje të mëdha mes skuadrave më të forta të Evropës.

Skuadra franceze do ta presë në shtëpi Barcelonën, Romën, Galatasarayn dhe Slovan Bratislavën, ndërsa do të udhëtojë për t’u përballur me Manchester Cityn, Aston Villën, Villarrealin dhe Comon e drejtuar nga ish-mesfushori i Barcelonës, Cesc Fabregas.

Edhe Arsenali do të ketë një kalendar të fortë. “Topçinjtë” do të përballen me Real Madridin, Bayern Munichun, Borussia Dortmundin, Real Betisin, Lillen, Napolin, Sabah Bakun dhe Slavia Pragën.

Liverpooli, ndërkohë, do të luajë kundër Atletico Madridit, Interit, Portos, Club Brugge, Villarrealit, Fenerbahçes, Lensit dhe LASK-ut.

Një tjetër skuadër angleze, Manchester United, do të ketë përballë Bayern Munichun, Romën, RB Leipzigun, Sabah Bakun, Atletico Madridin, Sportingun e Lisbonës, Villarrealin dhe Comon.

Në mesin e përballjeve më interesante të fazës së ligës janë Manchester City – Barcelona dhe Real Madrid – Inter.

Barcelona do të përballet gjithashtu me PSG-në, Aston Villën, Sportingun, Feyenoordin, Galatasarayn, Comon dhe Sabah Bakun.

Në këtë edicion do të marrin pjesë edhe disa emra të rinj në këtë fazë të garës. Como, Sabah Baku, LASK dhe Viking kanë arritur të sigurojnë pjesëmarrjen në fazën e ligës, duke shkruar histori për klubet e tyre.

Ky është sezoni i tretë që Champions League zhvillohet me formatin e ri. Të tridhjetë e gjashtë skuadrat janë pjesë e një tabele të përbashkët, ndërsa secila prej tyre luan nga tetë ndeshje kundër tetë kundërshtarëve të ndryshëm.

Ndeshjet e para të fazës së ligës do të zhvillohen nga 8 deri më 10 shtator, ndërsa xhiroja e fundit është planifikuar për fundin e janarit.

Finalja për këtë sezon do të zhvillohet më 5 qershor 2027 në stadiumin “Metropolitano” në Madrid.No description available.