Inspektorati i Mjedisit ka sekuestruar gjashtë ekskavatorë në Prizren, Pejë dhe Rahovec, pas evidentimit të veprimtarive të kundërligjshme të eksploatimit të zhavorrit përgjatë lumit Drini i Bardhë.

Lajmin e ka bërë të ditur ministrja e Ministrisë së Mjedisit, Planifikimit Hapësinor dhe Infrastrukturës, Fitore Pacolli, e cila ka njoftuar se aksioni është zhvilluar të enjten në terren nga Inspektorati i Mjedisit.

Sipas saj, në bashkëpunim me Policinë e Kosovës, në të gjitha mjetet e sekuestruara janë vendosur shiritat zyrtarë të ndalimit të punimeve.

“Lumenjtë tanë nuk janë pronë e askujt për t’i shfrytëzuar kundërligjshëm. Çdo shkelje do të trajtohet me seriozitet dhe çdo veprim që dëmton pasuritë tona natyrore do të përballet me ligjin”, ka shkruar Pacolli.