Lutfi Dalipi nuk ndalet, shënon sërish për Vaduzin
F.B/RTKLive
Reprezentuesi më i ri i Kombëtares së Kosovës, Lutfi Dalipi, po kalon një sezon të shkëlqyer në futbollin zviceran, duke vazhduar të jetë një nga lojtarët më të dalluar të skuadrës së Vaduzit.
Mesfushori ofensiv ka gjetur sërish rrugën drejt golit, këtë herë në barazimin 2:2 të Vaduzit në udhëtim ndaj Lausanne.
Dalipi realizoi në minutën e 78-të, duke barazuar rezultatin në 1:1 dhe duke e mbajtur skuadrën e tij në garë për një rezultat pozitiv.
20-vjeçari po dëshmon formë të jashtëzakonshme këtë edicion. Në 17 paraqitje në të gjitha garat, ai ka realizuar shtatë gola dhe ka regjistruar nëntë asistime.
Me paraqitjet dhe kontributin e tij në lojën e Vaduzit, Dalipi po tërheq gjithnjë e më shumë vëmendjen në futbollin zviceran, duke konfirmuar potencialin e tij për të ardhmen.






















