Anthony Davis nxjerr në shitje vilën luksoze, tremben Lakers
Anthony Davis dhe LeBron James janë basketbollistët kyç në skuadrën e Los Angeles Lakers, që këtë sezon janë shfaqur dominantë në Konferencën e Perëndimit dhe konsiderohen favoritë për t’u kthyer në fornin e NBA-së.
Lakers bënë një veprim të zgjuar verën e kaluar, kur vendosën të transferonin Lonzo Ball, Brandon Ingram, Josh Hart dhe zgjedhjen e katërt të draftit të vitit 2019 në New Orleans, në këmbim të një superylli si Anthony Davis. Lojtari iu bashkua kalifornianëve një vit para se të shndërrohet lojtar i lirë (sapo të mbyllet sezoni aktual, i ndërprerë tashmë për shkak të Koronavirusit).
Drejtuesit e Lakers e kishin të qartë që në fillim se do të vinte kjo situatë, që kërkojnë ta zgjidhin sa më parë.
Të gjithë mendojnë për vazhdimësinë e një prej lojtarëve më të mirë të NBA-së te Lakers, sidoqoftë, një veprim i bërë nga vetë Davis në orët e fundit ka ngritur dyshime për të ardhmen e tij.
Lojtari “all star” ka vënë në shitje rezidencën e tij në Westlake Village, në Los Angeles, çka ka shtuar thashethemet për një largim të mundshëm nga ekipi i Los Angeles gjatë kësaj vere. Davis ka vendosur ta shesë rezidencën e tij luksoze, që ka pesë dhoma gjumi, shtatë tualete, një pishinë me një rrëshqitje të dyfishtë dhe një palestër, që përfshin një fushë private basketbolli. Të gjitha për çmimin “modest” prej tetë milionë dollarësh.























