Maqedoni, familjarët rrëmbejnë të vdekurin nga spitali, dyshohej me COVID
Në një spital të Maqedonisë së Veriut, dhjetëra anëtarë të një familjeje kanë hyrë me dhunë në Klinikën Infektive dhe kanë marrë me gjithë krevat trupin e pajetë të të afërmit të tyre 49 vjeçar, që kishte ndërruar jetë pak minuta pasi ishte pranuar në spital.
Drejtori i spitalit të Strumicës, Naçe Gonov ka thënë për Alsat se gjithçka i ngjante filmit horror.
Ai u ka thënë medieve se kjo ka ndodhur të hënën në mëngjes, kur një grup prej 20 personave kanë arritur të futen në spital prej nga e kanë nxjerrë me gjithë krevat viktimën, 49 vjeç nga Strumica.
“Stafi i spitalit nuk mundi të bënte asgjë pasi ishte një grup i madh. Drejtuesit e spitalit iu shmangën incidentit ndërsa rastin e paraqitën në polici”, ka deklaruar ai.
Mjekët nuk kishin arritur ta testojnë pacientin për koronavirus, por bazuar në simptomat dhe gjendjen e rëndë shëndetësore, nga spitali kanë thënë se me gjasë viktima ishte i infektuar me këtë virus.
Nga spitali thonë se megjithatë testimi do të bëhet me asistencë të policisë, pasi familjarët nuk do të mund ta varrosin atë pa lejen e institucioneve përkatëse. Në Maqedoninë e Veriut edhe në raste tjera janë testuar persona pas vdekjes.
Strumica është në mesin e qyteteve maqedonase me numër të lartë të të infektuarve.























