Qeveria e Malit të Zi në pritje të mandatarit të ri
Presidenti i Malit të Zi, Milo Gjukanoviç pritet të propozojë emrin e kryeministrit në fund të kësaj jave ose në fillim të javës së ardhshme.
Përfaqësuesit e partive malazeze që kanë konfirmuar pjesëmarrjen në qeverinë e re të pakicës, jozyrtarisht thonë se kjo mund të ndodhë më 10 ose 11 shkurt, shkruan gazeta malazeze “Vijesti”.
Gjukanoviç, i cili deri mbrëmë ishte në një vizitë dyditore në Greqi, tha për TVCG se kishte përshtypjen se ekziston një pajtueshmëri e lartë për marrëveshje mes palëve të koalicionit, gjë që sipas tij, duhet të kulminojë me formimin e qeverisë së pakicës, që votohet nga një shumicë e qartë parlamentare.
Ai tha se të enjten do ta ketë mundsinë për të dëgjuar konsultimet dhe raportimet e palëve të koalicionit.
“Pas kësaj do të ishte iniciativa e presidentit të shtetit. Sinqerisht, shpresoj që raundi i parë i konsultimeve të jetë mbajtur në mungesën time dhe shpresoj se do të ketë mirëkuptim”, theksoi Gjukanoviç.
Sipas Kushtetutës së Malit të Zi, kreu i shtetit i propozon Kuvendit një mandatar për përbërjen e qeverisë pas një bisede me përfaqësues të partive parlamentare, përcjell AlbanianPost.
Megjithatë, në tetor 2020, një muaj e gjysmë pas zgjedhjeve, Gjukanoviç foli vetëm me kryeministrin në largim Zdravko Krivokapic, Abazoviç dhe kryetarin e parlamentit dhe liderin demokrat Aleksa Beçiç, si udhëheqës të tre koalicioneve fituese, pas së cilës ai dërgoi një propozim në parlament që Krivokapiçi të jetë mandatar.























