Presidenti Biden përmend Kosovën para ushtarëve amerikan në Poloni
Presidenti i ShBA-ve, Joe Biden gjatë një vizite në Poloni, është takuar me ushtarë amerikanë në qytetin polak të Rzeszóë.
Presidenti Biden nuk la pa përmendur edhe Kosovën.“Djali im ishte një vit në Irak, ai ishte gjashtë muaj në Kosovë, ai fitoi yllin e bronztë, medaljen e shërbimit dhe çmime të tjera. Gjëja më krenare që bëri ndonjëherë ishte veshja e asaj uniforme”, deklaroi Biden në një video të publikuar nga televizioni amerikan CNN, në rrjetin social Twitter.
Ndryshe presidenti i Shteteve të Bashkuara të Amerikës, Joe Biden, do të argumentojë në një fjalim në Poloni të shtunën se "bota e lirë" kundërshton pushtimin rus të Ukrainës dhe se ka unitet midis ekonomive kryesore për nevojën për të ndaluar Vladimir Putinin, tha Shtëpia e Bardhë.
Pas tre ditësh takime urgjente me aleatët e G7-tës, Këshillin Evropian dhe NATO-n, si dhe një vizite te trupat amerikane në Poloni, Biden do të takohet me presidentin polak, Andrzej Duda.
Në atë që zyrtarët amerikanë e quajnë një adresim të rëndësishëm në Poloni, Biden do të japë komente mbi “përpjekjet e bashkuara të botës së lirë për të mbështetur popullin e Ukrainës, për të mbajtur Rusinë përgjegjëse për luftën e saj brutale dhe për të mbrojtur një të ardhme që ka rrënjët në demokraci”, tha Shtëpia e Bardhë në një deklaratë.
Uashingtoni, duke kërkuar të shmangte një konflikt të drejtpërdrejtë me Rusinë, hodhi poshtë një ofertë të papritur nga Polonia për të transferuar avionë luftarakë MiG-29 të prodhimit rus në një bazë amerikane në Gjermani për t'u përdorur për të furnizuar forcat ajrore të Ukrainës.
Tani, Polonia dëshiron të përshpejtojë blerjen e raketave Patriot të prodhuara nga SHBA, avionëve luftarakë F35 dhe tankeve për sigurinë e saj dhe të kërkojë siguri për angazhimet e NATO-s për të mbrojtur anëtarët e saj. “Mbi të gjitha, ne duam garancinë e palëkundur që Shtetet e Bashkuara japin në kuadër të aleancës”, tha të premten kreu i Byrosë së Sigurisë Kombëtare, Pawel Soloch. "Sidomos këtu, ndaj Polonisë dhe vendeve të rajonit. Nëse do të kishte një sulm ndaj Polonisë, SHBA-ja do ta mbronte Poloninë", tha ai.























