Disa të vrarë nga të shtënat me armë në Cetinjë në Malin e Zi
Rtklive
Rajoni dhe Bota

Disa të vrarë nga të shtënat me armë në Cetinjë në Malin e Zi

REL

Të paktën 10 persona janë vrarë të premten më 12 gusht në Cetinjë të Malit të Zi, raporton agjencia e lajmeve Beta.

Sipas mediave, pas një konflikti familjar, një burrë 34 vjeçar ka nxjerrë armën dhe ka qëlluar mbi disa persona.

Jozyrtarisht mediat raportojnë për njëmbëdhjetë të vdekur dhe dhjetë të plagosur. Mes të plagosurve është edhe një polic.

Policia ka reaguar menjëherë dhe ka tentuar të neutralizojë të dyshuarin i cili nuk pranoi të dorëzohej dhe qëlloi në drejtim të punonjësve të policisë. Policia më pas qëlloi disa të shtëna dhe i dyshuari mbeti i vrarë.

Disa persona janë sjellë në Qendrën Spitalore Klinike në Podgoricë. Në vendngjarje ndodhet prokurori i lartë i shtetit, forcat e emergjencës dhe policia.

Për ngjarjen e rëndë ka reaguar edhe kryeministri i Malit të Zi, Dritan Abazoviq, i cili me anë të një mesaazhi në rrjetin social Telegram ka shprehur keqardhjen dhe ngushëllimet e tij për familjarët e viktimave.

"Ka ndodhur një tragjedi që Mali i Zi nuk e mban mend. Ftoj të gjithë qytetarët e Malit të Zi që të luten për familjet e viktimave të pafajshme, të afërmit, miqtë e tyre dhe të gjithë qytetarët e kryeqytetit historik të Cetinjës", shkruan Abazoviq.

Administrata e policisë malazeze ende nuk e ka njoftuar zyrtarisht incidentin.


MË SHUME NGA Rajoni dhe Bota