Rusia sulmon Harkivin, luftime të ashpra edhe në Herson
Foto: Rel
Rajoni dhe Bota

Rusia sulmon Harkivin, luftime të ashpra edhe në Herson

REL

Rusia ka kryer sulme ajrore në qytetin e dytë më të madh ukrainas, Harkiv. Sulmet gjatë natës goditën një stacion trenash dhe shkaktuan ndërprerje të rrymës për më shumë se 18.000 amvisëri, thanë zyrtarët më 28 shtator.

Guvernatori i Harkivit, Oleh Synehubov, tha se forcat ruse kanë goditur me raketa të llojit S-300, që janë armë të dizajnuara për mbrojtje ajrore, por shpesh përdoren edhe për të goditur infrastrukturat civile në qytetet ukrainase.

Shërbimi i emergjencave në rajonin e Harkivit tha se shpërthimet kanë shkatërruar një trafo elektrike dhe po ashtu kanë goditur edhe një punëtori.

Autoritetet nuk kanë raportuar për viktima, por kompania rajonale e energjisë elektrike tha se 18.500 konsumatorë në qarqet Shevçenkivski, Holodnogirski dhe Novobavarski, kanë mbetur pa furnizim me rrymë.

Sulmet në Harkiv vijnë pas një javë më parë u kryen sulme të ngjashme në një stacion trenash dhe në ndërtesat rezidenciale.

Luftime të ashpra po ashtu po vazhdojnë në rajonin e Hersonit, tha Ministria e Mbrojtjes së Britanisë në buletinin e përditshëm për luftën në Ukrainë.

Ministria britanike tha më 28 shtator se forcat ushtarake ruse në këtë zonë, të stacionuar në anën e djathtë të bregut të Lumit Dnipro, po sulmojnë pozicionet ukrainase.

Inteligjenca britanike tha po ashtu se Rusia po përdor forcat e saj për të vazhduar përpjekjet për të përparuar afër Bahmutit në Donbas, pavarësisht se forcat e Moskës janë nën presion të madh në veri dhe jug të Ukrainës.

Luftimet e fundit vijnë teksa zyrtarët amerikanë thanë se Uashingtoni po përgatit një pako të re të ndihmës ushtarake për Ukrainën në vlerë prej 1.1 miliard dollarësh.

SHBA-ja dhe shtetet e tjera perëndimore kanë ndihmuar me armë Ukrainën, qëkur Rusia nisi pushtimin e këtij shteti fqinj më 24 shkurt.


A.R Katana
Kosovo Telecom
Golden Eagle

MË SHUME NGA Rajoni dhe Bota