Qeveria e Lituanisë zgjat gjendjen e jashtëzakonshme në kufirin rus
atsh
Qeveria e Lituanisë vendosi sot të zgjasë sërish gjendjen e jashtëzakonshme në rajonet e saj kufitare me Rusinë dhe Bjellorusinë, deri më 16 mars të vitit të ardhshëm.
Statusi i emergjencës zbatohet në zonën kufitare si dhe në pika të tjera kufitare si aeroportet dhe stacionet hekurudhore.
Zgjatja e gjendjes së jashtëzakonshme pritet të miratohet nga parlamenti.
Lituania kufizohet me enklavën ruse të Detit Baltik të Kaliningradit, si dhe me aleatin e Rusisë, Bjellorusinë.
Gjendja e jashtëzakonshme u vendos menjëherë pas pushtimit rus të Ukrainës më 24 shkurt.
Fillimisht në shkallë vendi, gjendja e jashtëzakonshme u vendos edhe në rajonet kufitare dhe pikat e kontrollit.
Gjendja e jashtëzakonshme në rajonin kufitar me Bjellorusinë u shpall edhe më herët, në nëntor 2021.
Vendimi erdhi pasi udhëheqësi bjellorus, Alexander Lukashenko, lejoi mijëra migrantë të kalonin në kufijtë e tij me Bashkimin Evropian.























