Disa persona janë vrarë në një sallë mbledhjesh të Dëshmitarëve të Jehovait
BKT
Rajoni dhe Bota

Disa persona janë vrarë në një sallë mbledhjesh të Dëshmitarëve të Jehovait

Flutura Bekqeli/RTK

Disa persona janë vrarë nga të shtënat në një sallë mbledhjesh të Dëshmitarëve të Jehovait në qytetin verior gjerman të Hamburgut. Deri më tani nuk dihet motivi i sulmit, ndërsa mendohet se edhe sulmuesi është në mesin e të vdekurve.

Policia ka thënë se personi i armatosur ka vepruar i vetëm dhe mendohet se ka vdekur. Është e paqartë nëse sulmuesi është në mesin e gjashtë apo shtatë viktimave të raportuara nga mediat gjermane.

“Ende nuk ka informacion të besueshëm për motivin”, ka deklaruar policia.

Një numër njerëzish u plagosën gjithashtu në të shtënat në rrugën Deelböge, rrethi Gross Borstel, të enjten vonë. Policia thotë se në vendngjarje ka gjetur një person të vdekur për të cilin mendon se mund të ketë qenë autor dhe hetimet po vazhdojnë.

Ata u thirrën rreth orës 21:15 me orën lokale të enjten për të raportuar se ishin qëlluar të shtëna në ndërtesë. Oficerët që hynë brenda gjetën njerëz që "mund të jenë plagosur rëndë nga armët e zjarrit, disa prej tyre për vdekje".

Zëdhënësi i policisë tha se policia ende nuk i ka identifikuar viktimat dhe puna në vendin e krimit po vazhdon. Të premten në mëngjes, kancelari gjerman Olaf Scholz i përshkroi të shtënat si një "akt brutal dhune", duke thënë se mendimet e tij ishin me viktimat dhe të afërmit e tyre.

Në një deklaratë, komuniteti i Dëshmitarëve të Jehovait në Gjermani tha se ishte "thellësisht i pikëlluar nga sulmi i tmerrshëm ndaj anëtarëve të tij në Sallën e Mbretërisë në Hamburg pas një shërbimi fetar".

Mendohet se njerëzit ishin mbledhur, ndoshta për një studim biblik, kur të shtënat filluan rreth orës

21:00 me kohën lokale. Banorëve aty pranë u është thënë që të mos largohen nga shtëpitë e tyre në mes të operacionit të policisë në vazhdim.

Dëshmitarët e Jehovait janë anëtarë të një lëvizjeje fetare me bazë të krishterë. Emërtimi u themelua në SHBA në fund të shekullit të 19-të, nën udhëheqjen e Charles Taze Russell. Selia e lëvizjes është në Nju Jork.


MË SHUME NGA Rajoni dhe Bota