Jep dorëheqje kryeministri holandez, Mark Rutte
RTKlive
Kryeministri holandez, Mark Rutte dha dorëheqje pas rënies dramatike të qeverisë së koalicionit të tij.
“Ekzistojnë mosmarrëveshje midis katër partive të koalicionit për politikën e migracionit”, tha Rutte dje në mbrëmje, në Hagë. Ai shtoi se do t’i paraqiste dorëheqjen e tij me shkrim mbretit Willem-Alexander.
Rutte tha se i vinte keq që duhej të jepte dorëheqjen, por e përshkroi atë si “një realitet politik”.
Udhëheqësit e koalicionit katër partish ishin mbyllur në takime natën vonë të mërkurën dhe të enjten në një përpjekje për të arritur një marrëveshje mbi politikën e migracionit.
Rutte, njoftoi se dallimet midis partnerëve të koalicionit ishin “të papajtueshme”. “Kjo është arsyeja pse unë do t’i ofroj menjëherë mbretit dorëheqjen e të gjithë kabinetit me shkrim”, tha ai.
Ai nuk dha informacion nëse do të kandidojë sërish në zgjedhje të reja. Qeveria e katërt e liberalëve të krahut të djathtë ishte në detyrë që nga fillimi i vitit 2022.























