Kapen tetë tonelata drogë në Spanjë
Bardhyl Bajrami /RTK
Në një port të Spanjës është zbuluar një kontejner me tetë tonelata drogë e llojit kokainë. Droga kishte ardhur nga Surinami përmes Panamasë, do të shkonte në Portugali e më pas do të kthehej prapë në Spanjë përmes transportit rrugor.
Autoritetet spanjolle kanë kapur një sasi të madhe droge të llojit kokainë në portin e Algeciras në Andaluzi. Kontejneri po vinte nga surinami ndërsa po transportonte kinse gjeneratorë.
Agjencia spanjolle për taksa ka thënë se kjo është sasia më e madhe e kokainës e kapur në vitet e fundit ndërsa janë arrestuar tre persona, përfshirë pronarin e kompanisë për ku ishte nisur kontejneri si dhe personin përgjegjës për pranimin e dërgesës në Spanjë.
Kontejneri kishte rrugëtuar nga Surinami në Panama e prej aty në Algeciras ndërsa destinacioni i ardhshëm ishte Portugalia, prej ku përmes rrugëve do të kthehej përsëri në Spanjë.
Dogana e Spanjës kishte kontrolluar kontejnerin me skaner ku kishin vërejtur pako të renditura mjeshtërisht brenda një strukture metalike të deklaruar si gjenerator.
Sipas autoriteteve, struktura e metaltë kishte për qëllim t’i shmangej zbulimit nga skaneri ndërsa është hera e parë që u zbulua një metodë e tillë e fshehjes.
Droga, e llojit kokainë, ishte fshehur brenda një strukture metalike e deklaruar si gjenerator.























