Shembet ura në Baltimore të SHBA-së|VIDEO
Dardan Ramabaja/RTK
Ura kryesore e qytetit Baltimore në shtetin amerikan Maryland është shembur tërësisht kur një anije u përplas në të, njoftojnë zyrtarët.
Ura Francis Scott Key 2.57 km e gjatë në Baltimore të Marylandit, është shembur në orët e para të së martës pasi një anije me kontejnerë e goditi atë, ndërsa dyshohet se rreth shtatë persona mund të kenë rënë në ujë, njoftojnë zyrtarët.
Një video live e postuar në YouTube tregoi një anije duke goditur urën, pas së cilës disa nga hapësirat e saj u shembën në lumin Patapsco. Videot e pa verifikuara të postuara në rrjetet sociale në X gjithashtu treguan kolapsin.
Departamenti i Zjarrfikësve të Qytetit Baltimore e përshkroi shembjen si një incident me viktima të shumta dhe tha se punëtorët po kërkonin shtatë persona në lumë.
"Ne morëm disa telefonata rreth orës 1:30 të mëngjesit, se një anije goditi urën Key në Baltimore, duke shkaktuar shembjen. Ky është aktualisht një incident me viktima të shumta dhe ne jemi duke kërkuar për shtatë persona që janë në lumë," ka deklaruar drejtori i komunikimeve për Departamentin e Zjarrfikësve në Baltimore.
Policia e Baltimore tha se ishte njoftuar për incidentin në orën 1:35 të mëngjesit ET (535 GMT) të martën.
Të dhënat e gjurmimit të anijeve nga LSEG tregojnë një anije konteinerësh me flamur të Singaporit, Dali, në vendndodhjen përgjatë urës Key ku ndodhi aksidenti. Pronari i regjistruar i anijes është Grace Ocean Pte Ltd dhe menaxheri është Synergy Marine Group, tregojnë të dhënat e LSEG.
"Të gjitha korsitë mbyllën të dy drejtimet pas incidentit në urën Key, dhe trafiku është duke u anashkaluar," ka deklaruar Autoriteti i Transportit në Maryland në një postim në X.
Ura, e quajtur Francis Scott Key, u hap në vitin 1977 dhe kushtoi atë kohë rreth 60.3 milionë dollarë.























