Ish-komandanti i forcave të armatosura moldave, spiun rus
BKT
Rajoni dhe Bota

Ish-komandanti i forcave të armatosura moldave, spiun rus

M.Miftari/RTKlive

Igor Gorgan, i cili, gjithashtu mori pjesë në operacionet e NATO-s, transmetoi, ndër të tjera, informacione për transportet në Ukrainë.

Gjenerali Igor Gorgan, 54 vjeç, i cili shërbeu si komandant i forcave të armatosura të Moldavisë deri në shtator 2021, spiunoi atdheun e tij dhe aleatët e tij për vite me radhë, sipas inteligjencës ushtarake ruse - GRU.

Kështu raporton faqja ruse e lajmeve ‘Insider’, e cila ka hetuar aktivitetet e Gorgan së bashku me botimin e revistës moldave ‘Malenkaja Strana’.

Insajderi publikoi të mërkurën, përveç informacioneve të tjera, pjesë nga shkëmbimi i mesazheve mes Gorganit dhe mbikëqyrësit të tij të GRU-së, Aleksei Makarov.

Në mesazhe, Gorgan tregon për përpjekjet e Ukrainës për të blerë gjashtë aeroplanë luftëtarakë Mig-29 nga Moldavia, përmes një kompanie frontale, ardhjen e trenave me karburant nga Moldavia në Ukrainë, si dhe transportin e armëve nga një vend anëtar i NATO-s, Rumania, përmes Moldavisë në Ukrainë.

Gorgan, gjithashtu raporton në Moskë për situatën politike në Moldavi dhe fjalimet e presidentes Maia Sandu. Sipas mesazheve, marrëdhënia me Makarovin duket se është e ngushtë, të cilët janë takuar dhe kanë biseduar disa herë në telefon.

Pikëpamjet e Gorganit janë shumë të afërta me ato ruse. Pushtimi i Moldavisë ose një grusht shteti në vend duket se janë në mendjen e gjeneralit.

"Ne duhet ta pastrojmë shpejt këtë vend nga të gjitha pisllëqet fashiste," i shkruan Gorgan oficerit të GRU-së, pasuar nga tre pikëçuditëset. “Shumë janë gati, transmetojeni, tani është koha për të vepruar”.

"Unë e mbaj ushtrinë nën kontroll, për fat të mirë nuk ka Azov apo grupe të tjera naziste këtu dhe ne do të kujdesemi shpejt për politikanët."

I lindur në Moldavi, Gorgan u diplomua në shkollën e oficerëve në Novosibirsk pak para rënies së Bashkimit Sovjetik, më 1991, dhe shërbeu për një kohë në Odessa përpara se të transferohej në Kishinau, kryeqyteti i Moldavisë, si komandant kompanie. Midis 2003 dhe 2006, ai mori pjesë në operacionet e udhëhequra nga NATO, në Bosnje, Irak dhe Gjeorgji.

Gorgan u emërua për herë të parë si komandant i Forcave të Armatosura të Moldavisë në vitin 2013 dhe shërbeu për tre vjet. Ish-presidenti pro-rus i Moldavisë, Igor Dodon, riemëroi Gorganin si komandant në korrik 2019. Sandu pro-perëndimor e shkarkoi atë në shtator 2021.

Gazetarët investigativë nuk kanë mundur ta zbulojnë që kur Gorgan ka punuar për Rusinë. Burimi i ‘Insajderit’ nga inteligjenca ushtarake ruse, konsideron se Gorgan do të kishte filluar si spiun për Rusinë në vitin 2004, kur ai ishte jashtë vendit në misionet e NATO-s.

Sipas ‘Insajderit’, Gorgan u njoh me Makarovin kur ai ishte atashe ushtarak në Kishinau. Sipas informacioneve rumune, ai ishte, gjithashtu, në marrëdhënie të mira me dy atashetë e mëparshëm ushtarakë rusë.

Ish-komandanti Gorgan, aktualisht, është i punësuar nga agjencia e OKB-së për refugjatët UNHCR. Ai nuk i komentoi akuzat për spiunazh.

Adrian Balutel, shefi i shtabit të ushtrisë moldave, komentoi zbulimet për revistën ‘online Politico’, duke thënë se "krime të tilla shtetërore duhet të jepen dënime të rënda për tradhti". Sipas Balutelit, Gorgan do të humbasë shenjat dhe gradën ushtarake.

Sipas gazetës National të Moldavisë, zyra e prokurorit po heton pretendimet e Insajderit për spiunazh.

 

 


MË SHUME NGA Rajoni dhe Bota