BDI i reagon Mickoskit
Sh.Ç/RTKlive
Bashkimi Demokratik për Integrim ka reaguar ndaj deklaratave të fundit të kryeministrit të Maqedonisë së Veriut, Hristijan Mickoskit, i cili ka thënë se BDI-ja është parti politike e cila për momentin paraqet kërcënim dhe paraqet element radikal militant, jo vetëm për Maqedoninë e Veriut por edhe për rajonin.
Bashkimi Demokratik për Integrim, ka thënë se deklaratat e fundit të kryeministrit Mickoski janë një përsëritje e një taktike të njohur nga manuali i çdo regjimi autoritar të dështuar, shpikja e “armiqve” për të mbuluar paaftësinë për të udhëhequr.
“Ai nuk duhet të impresionohet me retorikën e tij, sepse kjo qasje – demonizimi i kundërshtarëve dhe fabrikimi i krizave imagjinare – është një strategji e vjetër, që gjithmonë dështon përballë realitetit. Në përpjekje për të heshtur shqiptarët nga reagimi për degradimin e Marrëveshjes së Ohrit, Mickovski përpiqet të kërcënon me shpikje për tentativa destabilizimi nga BDI”, thuhet në reagim.
Sipas BDI-së, politikat e supozuara “anti-korrupsion” të hartuara nga pallati luksoz i partisë më të pasur në Evropë nuk janë asgjë më shumë se një mbulesë për mungesën e tij të vizionit.
“Ndërsa inflacioni po rëndon çdo familje, ndërsa integrimi evropian është i bllokuar dhe ndërsa marrëdhëniet ndëretnike janë në teh, Mickoski vazhdon politikat e përçarjes dhe demonizimit. Kjo qasje është një dëshmi e qartë e paaftësisë së tij për të udhëhequr dhe për të adresuar krizat që e kanë çuar vendin në një rrugë pa krye. Mickoski ka më shumë se dy vite që me një fushatë dhe propagandë të egër ushqen sentimentin anti-BDI duke dashur që dështimet tre dekadëshe të shtetit që burojnë nga korrupsioni i partive Maqedonase t’ia faturoj BDI-së dhe shqiptarëve, e me këtë të arsyetoj qasjen selektive që është duke e bërë në luftën kundër këtij fenomeni”, thekson BDI.
Sipas BDI-së,.qytetarët e kuptojnë se një lider që ndan dhe përqendrohet në “armiq imagjinarë” nuk është i aftë të zgjidhë problemet reale që ata përballen.
“Në vend që të sjellë një perspektivë të re dhe të çojë vendin drejt integrimit evropian, Mickoski po e çon Maqedoninë e Veriut në izolim dhe regres. BDI mbetet e përkushtuar për të mbrojtur Marrëveshjen e Ohrit, stabilitetin ndëretnik dhe të ardhmen evropiane të Maqedonisë së Veriut. Shqiptarët dhe gjithë qytetarët do të refuzojnë politikat e përçarjes dhe do të kërkojnë një lidership që sjell drejtësi, zhvillim dhe barazi për të gjithë. Mickoski duhet të kuptojë se qytetarët nuk mund të mashtrohen më me retorikën e tij të vjetër dhe të njohur – ata e shohin qartë se kjo është vetëm një mbulesë për mungesën e vizionit”, theksohet në reagimin e BDI-së.























