Zelenskyy: Bisedimet pa Ukrainën nuk do të sjellin rezultate
BKT
Rajoni dhe Bota

Zelenskyy: Bisedimet pa Ukrainën nuk do të sjellin rezultate

M.M. /RTKlive

(E plotësuar) Presidenti i Ukrainës, Volodymyr Zelenskyy, ka shprehur qëndrimin e tij ndaj telefonatës së presidentin amerikan, Donald Trump, dhe homologut të tij rus, Vladimir Putin.

Zelenskyy tha fillimisht se shpreson që Trump ta plotësojë atë në detajet e bisedës telefonike, por shtoi se mbështet propozimin për të ndaluar goditjet në infrastrukturën energjetike për 30 ditë, raporton Skynews.

Ai tha se Ukraina do të mbështesë çdo ide që çon në një paqe të qëndrueshme dhe të drejtë, por se një armëpushim pa kushte do të ishte një hap më i mirë përpara.

Zelenskyy megjithatë tha se bisedimet e ardhshme për Ukrainën pa Kievin në tryezë nuk do të sjellin rezultate.

Duke iu drejtuar ofertës ruse për lirimin e 23 ushtarëve ukrainas të plagosur rëndë, ai tha se lirimi i të gjithë të burgosurve do të ishte një mënyrë e vërtetë për Rusinë për të treguar se është serioze për bisedimet e paqes.

Mbi kërkesën e Putinit për të parë ndalimin e të gjithë ndihmave të huaja ushtarake dhe shkëmbimit të inteligjencës, Zelenskyy tha se aleatët e Ukrainës nuk do të pajtoheshin kurrë me një veprim të tillë dhe se ai shpreson se furnizimet do të vazhdojnë.

Zelenskyy shtoi se kjo kërkesë ishte thjesht duke u përpjekur të dobësonte Ukrainën.

Udhëheqësi ukrainas tha gjithashtu se forcat e tij kishin vlerësuar se Rusia po përgatiste ofensiva të reja në disa rajone - Sumy, Kharkiv dhe Zaporizhzhia - në një përpjekje për të rritur presionin ndaj Kievit.

Ukraina ende nuk ka komentuar për telefonatën Trump-Putin

Presidenti ukrainas, Volodymyr Zelensky, ende nuk ka  dhënë një përgjigje zyrtare për bisedën telefonike mes presidentit amerikan, Donald Trump dhe atij rus, Vladimir Putin, ku thuhet se ky i fundit ka rënë dakord të ndalonte sulmet në infrastrukturën energjetike të Ukrainës për 30 ditë.

Presidenti Trump dhe presidenti Putin folën për nevojën për paqe dhe një armëpushim në luftën në Ukrainë. Të dy udhëheqësit ranë dakord se ky konflikt duhet të përfundojë me një paqe të qëndrueshme. Ata gjithashtu u pajtuan se një e ardhme me marrëdhënie të përmirësuara dypalëshe mes SHBA-së dhe Rusisë ka përparësi të mëdha.

Ndërsa Kremlini ka thënë se presidenti rus Putin është pajtuar për t’i ndërprerë sulmet ndaj infrastrukturës energjetike të Ukrainës për 30 ditë. Kremlini gjithashtu ka thënë se presidentët janë pajtuar që të mbesin në kontakt.


MË SHUME NGA Rajoni dhe Bota